Студопедия — Печатается по изданию Русско - Ливонские акты, стр. 451 - 453.
Студопедия Главная Случайная страница Обратная связь

Разделы: Автомобили Астрономия Биология География Дом и сад Другие языки Другое Информатика История Культура Литература Логика Математика Медицина Металлургия Механика Образование Охрана труда Педагогика Политика Право Психология Религия Риторика Социология Спорт Строительство Технология Туризм Физика Философия Финансы Химия Черчение Экология Экономика Электроника

Печатается по изданию Русско - Ливонские акты, стр. 451 - 453.






А рядъ мои съ Немьци таковъ: Аже боудоуть мои Смолняне въ Ризе, вольное търгование имъ въ Ризе. Аже боудоуть Смолняне на Гътьскомь березе, вольное търгование имъ на Гътьском березе. Аже боудоуть Немьци въ моемь Смольске, вольное имъ търгование въ моемь Смольньске. А места на корабли вольная, како Немечичю, тако и Смолняниноу. Аже оубьють моужа вольного, тъ выдати розбоиникы, колико то ихъ боудеть было; не боудеть розбоиниковъ, то дата за головоу 10 гривенъ серебра. Аже оубьють посла или попа, то двое того дати за головоу; аже не будеть розбоиниковъ, боудоуть розбоиници, выдати е. Или кто выбиеть око человекоу, или ногоу ототнеть, или роукоу ототьнеть, или иноую хромотоу въ теле оучинить, 5 гривенъ серебра платити, а за зоубъ 3 гривны серебра. Или человекъ человека деревъмь оударить до кръви, или по лицю оударить, а дати емоу 3 гривны серебра. Или человекъ ранить мечемь или ножемь, а хромоты на теле его не боудеть, дати емоу 3 гривны серебра. Или Роусьскомоу гъстьи притьчася пригодить въ Ризе или на Гътьскомь березе, никакоже его въ дыбоу въсадити. Аже боудеть пороука по нь, на пopoyцe его дати; или не боудеть пороукы, а въ железа и въсадити. Или Русьскыи гъсть свои тъварь дасть в дългъ в Ризе или на Гътьскомъ бере(зе) Немьчичю, а нъ дъдълженъ боудеть инемъ, Роусьскомоу же гъстьи напереде възяти. Или Немьчьскыи гъсть въ дългъ дасть Смоленьске свои тъваръ Роусиноу, аче дълженъ боудеть инемъ, Немечьскомоу гъстьи напереде възати. Аже боудеть владыце или мастерови или которомоу соудьи гневъ на которого Немьчица, а въсхочети и казнити, а боудеть тотъ дълженъ Немьчиць Смолняниноу, переже дати емоу тъваръ Смолняниноу, а въ проче его воля. Аже Смолнянинъ тъваръ дасть въ Ризе или на Гътьскомь березе, а не росплативъ ся поидеть къ богови, а кто его задьницю възметь, тътъ и гостиный тъваръ дасть. Аже боудеть търговати Смолняниноу съ Немьчицемь, Смолняниноу одинехъ Смолнянъ на послоушьство не выводити. Такоже и Немьчицю своихъ Немечь одинехъ на послоушестьво не выводити; ставити имъ на послоушьство Роусина же Немьчица, такоже и въ всехъ тяжахъ рядъ Смолняниноу съ Немьчицемь про послоушьство. Немьчичю же въ Ризе и на Гътьскомь березе Смолнянина на железо безъ его воле не лзе имати; оулюбить своею волею нести железо, тъ ть его воля виноватъ ли боудеть, своя емоу воля, или правъ боудеть, а 10 гривенъ серебра за соромъ емоу възяти. Немьчичю же не льзе позвати на поле Роусина битъ ся въ Ризе и на Гътьскомь березе, Роусиноу же не льзе позвати Немьчича на поле битъся Смоленьске. Тако межи себе оустановимъ. Оже имоуть ся бити Роусь въ Ризе и на Гътьскомъ березе мечи или соуличами, или иная тяжа оучинить ся межи самими, не надобе то владьще, ни иномоу соудьи Немьчьскомоу, ать оуправять ся сами по своему соудоу; такоже и Немьчемъ Смольньске. Оже который Немьчиць въ Ризе или на Гътьскомь березе свяжеть Смолнянина, или въ железа въсадить, за соромъ ему платити 3 гривны серебра; такоже и Немьчицю Смолиньске. Аже боудеть Смолняниноу Немьчичь дължьнъ въ Ризе или на Гътьскомь березе, правити емоу, поемъши детьскыи оу соудье. Тътъ ли детьскыи не исправить, возма мьздоу, приставите на нь дроугого, тъть ли еметь хытрити, а поставити и передъ соудьею, ать выдасть и соудья. Такоже и Немъчицю Смолиньске поставить и передъ княземь, ать выдасть и князь. Аже кто изотьметь дължь бита оу Смолянина въ Ризе или на Гътьскомь березе, то томоу за нь платити, кто и изетялъ; такоже и Немьчемъ Смольньске.. А от Смоленьска чистыи поуть до Ригы, а не надобе имъ ни вощець ни мыто, а на Волоце, како то есть пошло. А моимъ Смолняномъ въ Ризе и на Гътьскомь березе не надобе имъ ни вощець ни мыто. Аже Немьчиць коупить въ Ризе и на Гътьскомь березе оу Смолнянина товаръ, понесеть его домовь, а въсхочеть воротити, Смолняниноу же тътъ тъваръ не надобе боле; такоже и Немьчичю Смоленьске. Оже боудеть Смолняниноу с Немьчичемь тяжа в Ризе, тоу ся тяжють передъ Рижъскымь соудьею; боудеть ли тяжа Смолняниноу съ Немъчицемь на Гътьскъмь березе, а соудити и Гътьскымъ соудьямъ, тоу то и тяжи и коньць; боудеть ли тяжа Смоленьске Немьчицю съ Смолняниномь, соудити я Смоленьскомоу князю, то уже то и тяжи и коньць. Аже кто оуръветь бороды Смолнянину въ Ризе или на Гътьскомъ березе, или Смолнянинъ Немьчицю, томоу оурокъ 3 гривны серебра. Оже оуръветь Немьчиць бороды Смолняниноу Смольньске, дати емоу 3 гривны серебра. Оже оуръветь бороды Немьчиць бояриноу, или коуноемьчи, дати емоу 5 гривенъ серебра. А како боудеть Немьчьскыи гъсть Смоленьске почьнеть ся кто от нихъ просити в ыноую землю, то како то было при моемь отци, при Мьстиславе при Романовици, и при моемь брате при Мьстиславе, о немъ ся прашати, а мне е по доуме поущати. Аже оубьють тивоуна княжа, городьского, 20 гривенъ серебра, како и послоу. Оже имоуть Роусина вольного оу вольное жены въ Ризе или на Гътьскомь березе, оже оубьють, и тъть оубитъ; пакы ли не оубьють, платиит ему 3 гривны серебра; такоже и Немьчицю Смолиньске. Аже оучинить Роусинъ насилье въ Ризе или на Гътьскомь березе надъ вольною женою, а дотоле не слышати было до нее лихого, оурока за то 10 гривенъ серебра; такоже и Немьчицю Смоленьске. Аже оучинить Роусинъ насилье надъ робою въ Ризе или на Гътьскомь березе, платити емоу за соромъ гривну серебра; такоже и Немьчицю Смоленьске. Тоже есмь с вами рядъ свои доконьчалъ про свое моуже и про свое Смолняны. Аже въедеть братъ мои которыи въ Смолньскъ, а оучинится вам свада съ их моужьми, вамъ ся ведати с ними самемъ; или гость ис которое земле приедеть въ мои Смолньскъ, а боудеть вы с нимь свада, а выдайте ся с ними сами.

http://historic.ru/books/item/f00/s00/z0000083/st014.shtml

 







Дата добавления: 2015-09-15; просмотров: 403. Нарушение авторских прав; Мы поможем в написании вашей работы!



Расчетные и графические задания Равновесный объем - это объем, определяемый равенством спроса и предложения...

Кардиналистский и ординалистский подходы Кардиналистский (количественный подход) к анализу полезности основан на представлении о возможности измерения различных благ в условных единицах полезности...

Обзор компонентов Multisim Компоненты – это основа любой схемы, это все элементы, из которых она состоит. Multisim оперирует с двумя категориями...

Композиция из абстрактных геометрических фигур Данная композиция состоит из линий, штриховки, абстрактных геометрических форм...

Тактические действия нарядов полиции по предупреждению и пресечению групповых нарушений общественного порядка и массовых беспорядков В целях предупреждения разрастания групповых нарушений общественного порядка (далееГНОП) в массовые беспорядки подразделения (наряды) полиции осуществляют следующие мероприятия...

Механизм действия гормонов а) Цитозольный механизм действия гормонов. По цитозольному механизму действуют гормоны 1 группы...

Алгоритм выполнения манипуляции Приемы наружного акушерского исследования. Приемы Леопольда – Левицкого. Цель...

Разновидности сальников для насосов и правильный уход за ними   Сальники, используемые в насосном оборудовании, служат для герметизации пространства образованного кожухом и рабочим валом, выходящим через корпус наружу...

Дренирование желчных протоков Показаниями к дренированию желчных протоков являются декомпрессия на фоне внутрипротоковой гипертензии, интраоперационная холангиография, контроль за динамикой восстановления пассажа желчи в 12-перстную кишку...

Деятельность сестер милосердия общин Красного Креста ярко проявилась в период Тритоны – интервалы, в которых содержится три тона. К тритонам относятся увеличенная кварта (ув.4) и уменьшенная квинта (ум.5). Их можно построить на ступенях натурального и гармонического мажора и минора.  ...

Studopedia.info - Студопедия - 2014-2024 год . (0.009 сек.) русская версия | украинская версия