Артыкулъ 43.

О позвехъ наших земскихъ и кгродъскихъ, и якъ долъго трвати мають.

 

Уставуемъ тежъ, ижъ кождые позвы уряду земского и кгродъского, такъ тые, которыми бы не позвано, и яко и тые, которыми бы позвано, далей трвати и в моцы своей быти не мають, толко на одны роки судовые земъские албо рочки кгродъские, передъ которыми ихъ взято. И для того тые роки земские и рочки кгродъские, на которые се тыми позвы позывати будуть, в оныхъ позвехъ меновите мають быть описаны, окромъ того, естли бы по заложенью позвовъ роки земские або рочки кгродские сполъзли не сужоные за войною або поветреемъ, або за иншыми якими с часомъ припалыми причинами, о чомъ естъ нижей въ артыкулехъ сего жъ розъделу описано.

 

Артыкулъ 44.

Хто бы кого от суду належного до иного повету албо вряду и суду вызвалъ.

 

Уставуемъ, хотечи мети, абы нихто никого от суду належного до другого вряду и суду, то естъ яко о речи, земскому суду належачие, до вряду кгродского, такъ о речы вынятые на кгродский судъ, до земъского вряду и тежъ с повету в ынший поветъ, ани до комисаръского, подкоморъского и жадного иньшого суду неприналежного, также ани перед насъ, г[о]с[по]д[а]ра, ани перед судъ головный надъ сесь статутъ и порядокъ его и тежъ надъ артыкулы оного головного суду постановеные не смелъ вызывати. А хто бы то учинил, а до инъшого вряду и суду належного кого вызвалъ, тогды позваный толко ведомость вряду тому, до которого будеть позванъ, о таковомъ непорядномъ и неслушномъ позванью самъ або черезъ посланъца своего, на то умоцованого, маеть дати и обмову в томъ учинити. А таковыхъ позвовъ послушонъ быти и стороне за ними отказывати не будеть повиненъ, але еще тотъ, хто таковые позвы озметь и ими позоветь, за то, же мимо судъ свой належный смелъ то учинити, маеть заплатити вины тому вряду, отъ которого вызвалъ, копу грошей, а стороне - три рубли грошей. А то в тотъ часъ, кгды бы жалобникъ повторЪ о тую жъ речъ позвалъ и тые вины тотъ врядъ належный мает собе и стороне отъправити заразомъ, не позываючи о то, где бы оселый в томъ же повете былъ, тогды на оселости его. А естли бы оселости в ономъ повете не мелъ, тогды на маетности его рухомой. Пакли ж бы жалобникъ, позвавъши до суду належного, самъ не сталъ, а позваный становилсе, тогды предъсе позваному волно будеть о тую вину оного жалобника позвати на рокъ завитый до суду земъского з оселости его, в которомъ колвекъ повете мети ее будеть. А врядъ винЪнъ будеть ему тую вину сказати и на оселости его отправити, окромъ того, хто бы записомъ своимъ листомъ властнымъ, отступуючи повету албо которого суду своего належного, въ який иншый судъ доброволне ся вдалъ и опроч тое причины, которая ув ыншихъ артыкулехъ допущаеть с повету вызвати.

 

Артыкулъ 45.

О таковыхъ, которые бы, не маючи в которомъ поветЪ оселости, другого оселого позвалъ, а шло бы имъ обудвумъ сторонамъ о одну речъ, такъже и о томъ, который нигде оселости не маеть.

 

Тежъ уставуемъ: коли бы хто, не маючи в которомъ поветЪ оселости, другого кого там оселого позвал, а шло бы имъ обудвумъ сторонамъ о одну речъ, тогды тотъ позваный оселый можеть заразомъ не отповедати и в право сЪ не вдавати, аж бы се тежъ онъ противникъ его неоселый тамъ поддалъ и обвезалъсе листомъ своимъ и сознаньемъ перЪдъ врядомъ ему в томъ, гдЪ о одну речъ идеть, тамъ же у его поветЪ отповедати и усправедливятися [так!], не отзываючисе и не беручи собЪ до суду и повету своего. А кгды ся поддасть под тое и обвяжеть, тогды предъсЪ оный позваный за тыми жъ позвы на оный же часъ наперЪдъ будеть ему повиненъ усправедливитися. Пакли ж бы тотъ приеждчый жалобникъ зъ иншого повету, одеръжавшы собе справедливость, а позваному зася не усправедливившися, прочъ от суду от[ъ]ехалъ, тогды тотъ судъ и сказанье, ему вчиненое, не маеть быти ему выконывано. А естли бы хто нигдЪ в томъ паньстве, великомъ князстве литовском, оселости не маючи, оселого в которомъ повете позвалъ, а позваный бы до него, будь о тую жъ речъ албо о которую иншую дело мелъ, тогды таковый маеть напередъ по собе паруку оселого в томъ же повете дати, ижъ нигдЪ индей, одно на томъ же уряде стороне своей противной усправедливятися заразомъ скоро по своем праве будеть повиненъ. А гдЪ бы по своем праве уехалъ, не росправившисе з стороною противною, тогъды такежъ сказанье оное перъшое ему вделаное, до выконан[ь]я привожоно быти не маеть, а речи своее позваный местъцо истъца на паручнику искати тамъ же заразомъ маеть. А гдЪ бы и поручникъ не росправившисе уехалъ, тогды з нимъ за позвомъ справедливости доводити собе будеть у суду належного.