Старъшая братья не могуть именья недельного утратити, ани заставляти, только то, што на часть ихъ прислухати будеть.

Уставуемъ: естли бы колько братьи рожоное летъ дорослых и тежъ недорослыхъ зостало по отцы або по матъце, маючы именье спольное отчызное або матерыстое, и хотели бы старъшая братья, маючы вжо лета зуполъные, на томъ именью осести, а не могучы еще межы собою делу вечыстого мети, хотели бы тые именья свои только такъ на части розняти до летъ зуполъныхъ молодъшое братьи и до делу вечного, тогды то имъ вольно будеть. А ведъ же если бы который з нихъ, деръжачы такую часть, будь свою огуломъ або тежъ што такового з нее выделившы, кому зоставилъ або продалъ, тогды потомъ, кгды меньшая братья, доросъшы летъ зуполъных, похочуть ся вжо вечнымъ деломъ тымъ именъемъ поделити, мають того, который будеть купилъ албо закупилъ, прыпозвати передъ судъ земъский на рокъ завитый, абы тое именье в ровный делъ с ними поделилъ. А судъ делъ ровный всказати имъ повиненъ будеть. А тотъ, хто таковую часть купилъ албо закупил, повиненъ будеть всю тую куплю свою с тою братьею, яко отчычами того именья, в ровный и вечный делъ поделити, прыймуючи во всей той суме своей тую часть, которая бы толко на того брата водле права его з делу прирожоного пришла. А хотя бы тежъ и болшъ п[е]н[е]зей на то далъ, нижли чого то стояло, вжо на томъ переставати будеть повиненъ. К тому тежъ, естли бы который таковый з братьи, рознявшы именье до делу, яко се вышей поменило, хотя бы его не продалъ або не заставилъ, толко якое спустошенье учинилъ, то естъ подданыхъ розогналъ або лесы пожыточные на попелъ, ванъчосъ, клепки и иные роботы лесные потребные, албо гаи и боры, на будованъе годные, вырубалъ, выпродалъ и выпустошилъ або роздалъ, тогды тые другие братья въ своихъ частяхъ на томъ шкодовати не повинъни, але при вечномъ делу маеть быти тая вся шкода зъ его части братъи его нагорожона и заплачона. А колко будеть подданыхъ за держанья своего розогналъ, такъ много вжо братья на делу людей додати ему не мають и не повинъни будуть. Вед же дров и на будован[ь]е дерева на свою потребу волно будеть до того ж имен[ь]я брати.

 

Артыкулъ 13.

О братьи летъ дорослой, иле ихъ колвекъ будеть, яко се именьемъ делити и имъ шафовати мають.

 

Тежъ уставуемъ: естли бы колко братьи было летъ доросълыхъ, а мели бы именья нерозделеные, а одинъ бы з нихъ, будучи потребенъ п[е]н[е]зей, хотелъ часть свою того именья кому колвекъ, будь тежъ обчому, заставити або продати, а тая бы братья его не хотели з нимъ того именья делити, тогды тотъ брат маеть ихъ о то позвать до суду земъского на рокъ завитый, за которымъ припозваньемъ врядъ маеть имъ рокъ зложити ку розделенью того именья надалей за две недели або яко на то часъ погодный знесеть. А ку тому розделу маеть врядъ имъ возного и двухъ шляхтичовъ придать, положившы на упорныхъ заруки толко, колко тая часть стоить. А если бы тая брат[ь]я предъсе делу с тымъ братомъ и на ономъ року приняти не хотели, тогды будуть повинъни оному брату заруки заплатити. Врядъ вжо будеть повиненъ то черезъ листъ свой отослати до подъкоморого, а подкоморый, за позвы своими зъехавшы, мает и моцонъ будеть, тому брату часть, во всемъ ему належачую, справедливе выделившы, подати и заруки сказати, а о отправу зарукъ до вряду земского ведле арътыкуловъ, около владзы вряду подкоморъского описаныхъ, отослати. Который дел такъ моцонъ будеть, яко тежъ и въ иншых речахъ отправа, з уряду учиненая, и вечне межы собою тотъ делъ вжо деръжати мають. А тому брату волно будеть тоею частью своею якъ хотя шафовати водле сего статуту и арътыкуловъ, в немъ описаных.

 

Артыкулъ 14.

Опекунъ, деръжачи именье ув опеце, не маеть ничого за свою вину того именья утрачать.

 

Коли бы хто чужое именье в опеце деръжалъ, а былъ бы о якие кривды суседъские або долъги, або о якие иные права свои у суду поконанъ, таковый кождый, естли бы былъ на своей властности оселый, за таковый выступокъ свой, с права сказаный, з власного именья и маетности своее платити маеть. А в недостатку именья и маетности, рухомых речей и на самомъ истъцу маеть быти отправа учинена, а именье, которое бы ув опеце деръжалъ, от того волно будеть.