Ра́дуйся, Полта́вская небоявле́нная звездо́, святи́телю Христо́в и му́чениче Васи́лие!Кондак 5 Боготе́чная звезда́ яви́ся Оте́честву на́шему, боголюби́ве Васи́лие, егда́ и во времена́ сму́тныя непреста́нно труди́лся еси́, испове́данием твои́м утвержда́я ве́ру и́стинную, мно́гия соедини́в во еди́ное ста́до Христа́ Бо́га на́шего, науча́я пе́ти Ему́: Аллилу́иа. Икос 5 Ви́деша по́двиги твоя́, лю́ди избра́ша тя на Собо́р церко́вный, я́ко в Бо́зе умудре́ннаго, да просла́вится Бог в сове́те святы́х. Ты же та́мо мно́гими словесы́ увеща́л еси́ храни́ти Це́рковь Христо́ву непреобори́му от безбо́жников и отсту́пников, еще́ же и моли́твы возноси́ти о Ца́рственных страстоте́рпцех по убие́нии о́ных. Мы же, дивя́щеся де́йствию Ду́ха Свята́го, сотво́ршаго тогда́ вся́кое бла́го о Це́ркви на́шей и святи́теля Ти́хона на све́щнице Патриа́ршего служе́ния возста́вившаго, воспева́ем ти та́ко: Ра́дуйся, му́дрых ве́ка сего́ прему́дрейший; ра́дуйся, ра́бе Христо́в добре́йший. Ра́дуйся, тала́нт сво́й в зе́млю не сокры́вый; ра́дуйся, к сла́ве Бо́жией сей употреби́вый. Ра́дуйся, и́стинным све́том просвети́телю; ра́дуйся, Со́лнца пра́вды служи́телю. Ра́дуйся, о сла́ве Ца́рственных страстоте́рпцев поревнова́вый; ра́дуйся, я́коже о́ныя вене́ц му́ченический прия́вый. Ра́дуйся, Полта́вская небоявле́нная звездо́, святи́телю Христо́в и му́чениче Васи́лие! Кондак 6 Пропове́дник от Бо́га яви́лся еси́ земли́ Полта́встей, преди́вне Васи́лие, богому́дрым епи́скопом Феофа́ном при́званный во гра́д наш в годи́ну лихоле́тия, да укрепи́ши па́ству Христо́ву в ве́ре и́стинней супро́тив ле́сти богобо́рческой, науча́я воспева́ти Триеди́ному Бо́гу: Аллилу́иа. Икос 6 Возсия́л еси́ в Богоспаса́емом гра́де Полта́ве я́ко звезда́, ко Христу́ путеводя́щая, о́тче Васи́лие, егда́ во свяще́ннические оде́жды облече́ тя боголюби́вый святи́тель Феофа́н, во хра́ме Живоноча́льныя Тро́ицы поставля́я тя пасти́ па́ству слове́сную, сего́ ра́ди взыва́ем тебе́ уми́льно: Ра́дуйся, И́стиннаго Бо́га ве́рный служи́телю; ра́дуйся, Та́ин Христо́вых благогове́йный соверши́телю. Ра́дуйся, па́ству твою́ Хле́бом Жи́зни напита́вый; ра́дуйся, Ча́шею Безсме́ртия ве́рныя напои́вый. Ра́дуйся, несокруши́мый щи́те, охраня́яй благоче́стие; ра́дуйся, обоюдуо́стрый мечю́, посеца́яй злоче́стие. Ра́дуйся, свети́льниче, на све́щнице церко́внем горя́й; ра́дуйся, огне́, ду́ши теплото́ю духо́вною согрева́яй. Ра́дуйся, Полта́вская небоявле́нная звездо́, святи́телю Христо́в и му́чениче Васи́лие! Кондак 7 Хотя́й Человеколю́бец Госпо́дь укрепи́ти лю́ди Своя́, яви́ тя, свяще́нне Васи́лие, па́стыря до́бра, ни еди́ное слове́сное овча́ не оставля́юща, в дерзнове́нных глаго́лах твои́х насажда́юща пра́вую ве́ру и И́стину, сего́ бо ра́ди муже́й и жен, всяк во́зраст и сосло́вие собра́л еси́, науча́я еди́неми усты́ и еди́нем се́рдцем пе́ти с тобо́ю Бо́гу: Аллилу́иа. Икос 7 Но́вое яви́ся гоне́ние на Це́рковь Бо́жию, егда́ мно́зи свяще́нницы, мона́си и лю́дие Боголюби́вии прия́ша сме́рть му́ченическую от богобо́рцев, за́вистию диа́вольскою гони́мии, ты же претерпе́л еси́ поноше́ние, христоно́сне о́тче, егда́ и судо́м непра́ведным осужде́н быв, терпе́ние яви́л еси́ преди́вное. Мы же, ви́дяще смире́ние твое́, похваля́ем тя си́це: Ра́дуйся, несе́нием креста́ твоего́ Христо́ви подража́яй; ра́дуйся, себе́ я́ко же́ртву свяще́нную Бо́гови уготовля́яй. Ра́дуйся, терпе́ние великоду́шное пред клеветники́ яви́вый; ра́дуйся, на суди́щи непра́веднем тех му́дре обличи́вый. Ра́дуйся, во́ине Христо́в непобеди́мый; ра́дуйся, в злострада́ниих тверде́йший адама́нта пребы́вый. Ра́дуйся, я́ко тобо́ю безу́мнии гони́телие посрамля́ются; ра́дуйся, я́ко тобо́ю си́ла Бо́жия явля́ется. Ра́дуйся, Полта́вская небоявле́нная звездо́, святи́телю Христо́в и му́чениче Васи́лие! Кондак 8 Стра́нно бысть лю́дем малове́рным, зря́щим преди́вную любо́вь твою́ ко Го́споду, блаже́нне Васи́лие, егда́ на суди́щи льсти́вем не отре́клся еси́ слове́с свои́х, я́ко невозмо́жно е́сть оскверни́ти рука́ми нечи́стыми сосу́дов свяще́нных, в ни́хже возноси́л еси́ Свята́я Святы́х Бо́гови, воспева́я: Аллилу́иа. Икос 8 Всего́ себе́ Го́сподеви преда́в, о́тче богому́дре, лжу и клевету́ прия́л еси́, я́ко Бо́гом даро́ванное бога́тство, блаже́нство Ца́рства Небе́снаго созерца́я. Угото́вал еси́ себе́ в же́ртву благово́нную подвигополо́жнику Христу́, до́брому по́двигу любве́ науча́я люде́й полта́вских и всех, воспева́ющих ти такова́я: Ра́дуйся, победоно́сною све́тлостию облече́нный; ра́дуйся, ли́ку испове́дников сопричте́нный. Ра́дуйся, учениче́ усе́рдный сме́рти Победи́теля; ра́дуйся, после́дователю ве́рный распя́таго Учи́теля. Ра́дуйся, блужда́ющих в духо́вном мра́це окорми́телю; ра́дуйся, честне́йший Правосла́вия храни́телю. Ра́дуйся, я́ко пра́ведно даде́ся ти жре́бий па́стырскаго о душа́х попече́ния; ра́дуйся, я́ко и ны́не возно́сиши о нас сугу́быя моле́ния.
|
