Што мають судити воеводове, старостове и деръжавцы и о ихъ позвехъ, о што мають даваны быти, и о сказанью за нестаньемъ сторонъ и о горачомъ учинъку.

Уставуемъ тежъ, хотечи мети, и даемъ моцъ, абы воеводове и старостове наши судовые, кождый в повете и вряде своемъ судовомъ, судили и справовали и позвы свои давали о тые арътыкулы, меновите тутъ описаные, то естъ о наездъ кгвалътовный на домъ шляхетъский, не толко на самый дворъ, але и на гумно або на дворецъ, гдЪ быдло и инъшое г[о]с[по]д[а]ръство домовое бываеть ховано, к тому о кгвалтъ костела хрестияньского водълугъ арътыкулу третего в розъделе одинадъцатомъ, о кгвалътоване паненъ и невестъ, о кгвалтъ в местех нашихъ, о розбой по дорогахъ, о злодейство, о фалшъ, о пожогу дому або гумна, о чародейство, о трутизну и отповедь от шляхътича шляхътичу на здоровъе або огнемъ, и о голову шляхетъскую, такъже и поручниковъ такихъ, которые бы о похвалъку на горъло або огнемъ кого ручили. Але о збеги слуги и подданыхъ вшелякихъ и челеди невольное, о то, похочеть ли, до кгроду або до земъства волно будеть позвать. А врядъ, а в небытности ихъ наместъники ихъ оселые з судьею и писаромъ замковыми, присяглыми и в том воеводъстве або повете тежъ оселыми, мають и моцъ мети будуть судити, отправовати и кончити подле сего статуту. А гдЪ бы хто на горачомъ учинку тыхъ вышей помененыхъ арътыкуловъ которого жъ кольвекъ стану былъ пойманъ, тогды тотъ маеть быти сужонъ без позвовъ. А тое иманье оселого на горачомъ учинку маеть се розумети, коли бы хто могъ быти пойманъ заразомъ того жъ часу на самомъ такомъ учинку, о што горъломъ карають. А естли бы, таковый збытокъ учинивши, заразомъ пойматисе не далъ, але бы зникалъ або се скрил, такового вольно искати з урядомъ, ведъ же не далей, одно от пополъненья того учинку через двадъцать чотыри годины зекгаровые. А то се маеть розумети о томъ, гдЪ бы се што такового збытку стало в месте альбо в селе, але хто бы и в томъ часе з места або з села, гдЪ ся учинокъ станеть до именья и до дому своего шляхетъского уехалъ альбо вшолъ, тотъ иманъ вжо быти не маеть, одно позыванъ, а неоселого завжды, коли и гдЪ может потрафити, волно имати. А пакли бы заразомъ на горачомъ таковомъ учинку оселый не былъ пойманъ, тогды вжо позвы от вряду замкового ку праву маеть быти припозванъ, за которыми позвы, звлаща в речахъ таких крвавыхъ, гдЪ о горъло идеть, сторона позваная не черезъ умоцованого, але сама очевисте повинна у суду становитися, а позву таковому кгродъскому рокъ не маеть быти долъжейший такъ за очевистымъ, яко и зао[ч]ным поданьемъ позву толко за чотыри недели. А естли бы хто якого кольвекъ стану, также и рожаю, будь мужского або и женьского, будучи до суду кгродъского позванъ, а за тыми позвы и на тотъ рокъ стати або, ставшы, а росправитьсе не хотелъ, а шло бы о такую речъ крвавую, за што горъломъ карають, тогъды тотъ врядъ маеть его за нестанъного на выволанье здати и о томъ намъ, господару, черезъ листъ свой отвороный ознаймити, а мы, тому не фолькгуючы, без всякое проволоки и откладанья на инъшый часъ, але заразомъ взявшы о томъ от того вряду на того ведомость такового обвиненого и вряду нашого непослушного, маемъ зъ земли паньствъ нашых казати выволати. А гдЪ бы выволаный, в таковомъ учинку хотечи се того справити, насъ, г[о]с[по]д[а]ра, о кглейтъ просилъ, тогды мы, г[о]с[по]д[а]ръ, таковымъ выволаньцомъ маемъ подънесенье на выволанье и листы наши кглейтовые ку справе зъ замереньемъ на то певного часу, и то неболшъ толко до трехъ разовъ, давати водлугъ арътыкулу в розделе перъвшомъ дванадъцатого, абы се за кглейтомъ нашимъ того, хто в чомъ будеть обвиненъ, справовалъ передъ урядомъ нашимъ оного жъ воеводъства або повету, гдЪ се початокъ тое справы станеть.

А што бы власному суду нашому, г[о]с[по]д[а]ръскому, належало, то мы сами с паны радами нашими без жадное проволоки и откладовъ судити и росправовати маемъ. Вед же тое подънесенье выволан[ь]я и кглейтъ нашъ предъсе горачому учинку и праву а каранью, о немъ в статуте описаному, ничого уближати и уймовати не маеть, але мужобойца, правомъ переконаный, горъломъ каранъ будеть, а головщина, навезка и шкоды, о што буде [так!] позвано заразомъ безъ складанья роковъ статутовыхъ, яко сторона объжалованая на року позваномъ не станеть, маеть от насъ, г[о]с[по]д[а]ра, если се то в суду нашого точити будеть, а если на вряде, тогъды такежъ и от вряду нашого судового увязанье въ именье объвиненого, до сконъченья права дано быти, а о самого особу, яко вышей поменено, маеть врядъ на выволанье до насъ, г[о]с[по]д[а]ра, отослати. Ведь же в речахъ меньшихъ, не кривавыхъ, где о горъло не идеть, врядъ не маеть на выволанье нестаного отсылати, только для непослушенъства речъ, на позве описаную, без доводу сказати виненъ будеть, вынявши то, хто бы былъ позван о неучиненье досыть запису або суду и сказанью врядовому. Противъ таковому сказанье за узнаньемъ запису або водлугъ суду перъшого чинено быти маеть. Можеть тежъ врядъ кгродский судити о кгвалтовное выбитье з дому, з упокойного мешкан[ь]я и отнятья именья, людей и всяких кгрунътовъ, звлаща естли бы сторона укривжоная мимо судъ земъский для прудъшое справедливости хотела о то до кгроду [в оригинале "кргоду"] позвати обычаемъ и способомъ, нижей описанымъ. Еще тежъ позывано быти может до кгроду о збитье возного и неучъщенье листовъ, от него посланыхъ, и о мери на зъбожъе и на инъшие речи, неслушне надъ уставу сего статуту бранье, о безъправное везенье шляхтича, яко о томъ всемъ ширей на своихъ местъцахъ в томъ же статуте ест описано. А болшъ того надъ тые арътыкулы, вышей помененые и на судъ кгродъский в семъ статуте вынятые, не маеть суд кгродский позвовъ своихъ давати и судити. А естли бы надъ сее замеренье важилъсе врядъ кого упоръне судити, тогды судъ его не маеть быти деръжанъ.