Кондак 1. Молитвами святых отец наших, Господи, Иисусе Христе, Боже наш, помилуй нас

Вечная память (трижды).

Душа его во благих водворится, и память его в род и род.

Акафист святому мученику Трифону

Память празднуем 1/14 февраля

Кондак 1

Избранный от Бога и к лику святых сопричтенный, святый мучениче Трифоне! Молися о нас, грешных, Владыце Христу и помогай нам побеждати мир, плоть и диавола, многообразно воюющия на ны, якоже победил еси их благодатию и силою возлюбленнаго тобою Христа, да, избавльшеся от врагов наших видимых и невидимых, благодарственно воззовем ти:

Радуйся, Трифоне, скорый помощниче всем, с верою и любовию к тебе притекающим!

Икос 1

Образу благочестия родителей твоих подражая, христианския нравы от лет малых приял еси, святый мучениче, и мал сый леты, стар же разумом, воистину христианин совершен явился еси. Мы же, воспоминающе добродетельное житие твое, восхваляем тя сице:

Радуйся, добронравных родителей благочестивый сыне; радуйся, великое их утешение. Радуйся, Ангела твоего Хранителя непрестанное веселие; радуйся, от юности твоея всего себе Богу предавый. Радуйся, от юности Христа возлюбивый; радуйся, от малых лет благодать Божию обильно стяжавый. Радуйся, душу свою непорочну явивый; радуйся, себе самаго в храм Духа Святаго уготовавый. Радуйся, отроком образ жития святаго показавый; радуйся, благочестием твоим верныя возвеселяяй. Радуйся, от малых лет за вся сия Богом возлюбленный.

Радуйся, Трифоне, скорый помощниче всем, с верою и любовию к тебе притекающим.