Вся шляхта поветовая повинъни становитисе подъ хоруговъю.

 

Хочемъ тежъ мети и приказуемъ грозно, абы вси подданые наши яко старосты, державцы, подъкоморые и иные врядники земъские поветовые, такъ и рыцерство, шляхъта и кождый станъ шляхетъский, войну служити повиньни будучи, на войне нигде се индей не шиховали, ани становили особами своими и с почъты, одно под хоруговъю своею поветовою, в которомъ суть повете оселыми.

 

А естли бы который з нихъ служилъ намъ, г[о]с[по]д[а]ру, у двору нашого, албо за пенези жолнеръские бралъ, албо тежъ у которого с пановъ радъ нашыхъ, або врядниковъ, або тежъ у кого иного, ино тотъ повиненъ будеть подъ хоруговъю на местъцы своемъ поставити брата або кревного своего, або такъ доброго шляхтича, яко и самъ, абы тымъ местъца своего не опустилъ и не омешкалъ подъ страченьемъ именья своего. А тотъ почотъ его завжды маеть быти межы иншою шляхтою при хоружомъ и под справою хоружого, а не при немъ самомъ. А панове рады и врядники наши земъские и дворъные, княжата, панята - тые мають се становити на местъцахъ своихъ подлугъ стародавного обычаю, яко нижей о томъ описано.

 

Артыкулъ 8.

О шляхте, которые в розъныхъ поветехъ именья мають.

 

Уставуемъ: которие шляхта подданые наши мають в розныхъ поветехъ именья свои, таковый маеть в томъ повете, в котором будеть наголовнейшое именье свое мети со всихъ именей отчизных, выслужоных, купленыхъ и женнихъ, самъ стати и почотъ свой поставити. А иные станы водлугъ вышъшого арътыкулу семого заховатисе мають.

 

Артыкулъ 9.

О духовъныхъ, яко мають служъбу земъскую служити.

 

Уставуемъ тежъ, ижъ вси духовъные з ыменей своихъ светъскихъ и костелъныхъ наданых, с которыхъ служъба земъская военъная бывала, такъже з ыменей своихъ отчизных, купленых и закупленых шляхетъскихъ, войне повинъныхъ, службу земъскую военъную мають служити тымъ обычаемъ, выправуючи с тыхъ именей своихъ почотъ повинный и при немъ за свою особу ч[е]л[о]в[е]ка доброго шляхтича, войне годного, водле уфалы земъское соймовое. А тые почты свои становити мають подъ хоруговъю поветовою межы обывателей тыхъ поветовъ, в которыхъ хто з нихъ именья головнейшие маеть. Теж за позволеньемъ всихъ становъ а за прозбою колиятовъ колеиумъ Виленьского зъ именей тых, которые от кого кольвекъ на тое ку колеиумъ наданые албо якимъ кольвекъ способомъ набытые до сего часу мають, от выправованья на службу земъскую военъную волными чынимъ. Але естли што болшъ именей до того колеиумъ Виленьского якимъ кольвекъ способом по выданью сего статуту потомъ набыли, с таковыхъ всихъ они потомъ на службу земъскую военъную почты с тыхъ именей повинъни, ровно яко и шляхта великого князства литовъского, выправовати будуть повинъни. Вед же гдЪ бы на сойме сполномъ податокъ який на оборону речы посполитое былъ ухваленъ, тогды они со всихъ добръ своих колеятъскихъ, якимъ кольвекъ обычаемъ первей сего и потомъ набытыхъ, таковый податокъ выдавати будуть повинъни. А справы судовые зо всихъ тыхъ добръ своих, которые теперъ набытые мають, отправовати будуть тымъ же способомъ, яко инъшые станы духовные.

 

Артыкулъ 10.

Абы се по шыхованью з войска не роз[ъ]ежъдчали и о станехъ.

 

Теж уставуемъ, ижъ кождый подданый нашъ, пописавъшисе у ших обычаемъ вышей писанымь с тыми жъ коньми и з бронями, с которыми се показалъ при насъ або при гетмане нашомъ, повиненъ будеть войну служити на тыхъ же конях и с тыми жъ зброями ажъ до суполного роспущенья войска нашого. А который бы кольвекъ подъданый нашъ, хотя пописавшисе и шиховавшисе, без воли и ведомости гетманьское з войска проч поехалъ або што почту своего повинъного до дому отпустилъ, таковый именье тратит, яко бы войны не служилъ. А естли бы тотъ, хто пенези у кого на службу военъную бравъшы, а былъ бы чоловекъ неоселый, а то тежъ учинилъ, таковый кождый честь свою тратить такъ, яко бы з битвы утекъ. А на пописе маеть кождого коня гетман нашъ казати, у шерсть написати и петно, которое на кони будеть, на рейстре намалевати. А станы свои поветники на войне при хоружомъ въ одномъ местъцы мети мають, а не розно.

 

Артыкулъ 11.