О речахъ заставъныхъ, зъгинулыхъ в чиемъ схованью.

Уставуемъ тежъ: хто бы кому хотелъ речы рухомые заставити або в захованье дати, тогды на таковые речы на обе сътороне для упевненья листы межы себе под печатми своими и печатми людей добрыхъ маютъ давати. А где бы тые речы, в заставе або в захованью будучые, посполу в одномъ кгмаху з речъми домового г[о]с[по]д[а]ра пригодне огнемъ погорели або покрадены, а он бы то вряду, под которымъ седитъ, тогды жъ оповедалъ, и къ тому будет ли еще при тыхъ речахъ и властивое маетности его што украдено або згорело, тогды маеть самъ на томъ присягнути, ижъ оныхъ речей не скорыстилъ и ку пожитъку своему ничого не обернулъ. За таковымъ отприсеженьемъ ма быт[ь] волен. А пакли бы поведилъ, же толко того речы, хто далъ сховати, згорели або покрадены, а оного г[о]с[по]д[а]ра самого целы, таковый тые речы вси повиненъ оному вернути або заплатити. А естли в суме п[е]н[е]зей заставлено, ино пенези взяти, а тые речы предъсе вернути, на што слушный доводъ учынитъ. Такъ тежъ естли хто у кого зложилъ в клети або въ якомъ схован[ь]ю речы свои и замъкнул, а домовый г[о]с[по]д[а]ръ тые речи в небытности его рушалъ або на иншое местъцо перенесъ, а в томъ бы се шкода стала, тогды тотъ, хто рушалъ, маетъ тую всю шкоду платити тежъ за слушным доводомъ або присегою оного шкодного. А где бы се то трафило, жебы без листовъ хто кому речи якие в заставу, в захованье або быдла на перехованье далъ, а тотъ, в кого бы што заставлено, або в захованье, або тежъ на перехованье дано, до того се не зналъ, тогды не згола маеть быти воленъ, але повиненъ будетъ на томъ присягнути, яко того от него не мелъ. А пакъли бы в чыем схованью таковые речы взяты были от кого кгвалтомъ, тогъды на объжалованомъ тотъ, у чыемъ охованью [так!] было, доходити ихъ маетъ. А навезка таковыхъ речей тому, чыя была властъност[ь], з самого истизъного от того, у кого взято, зыскавъшы, вернена быти маетъ.

 

Артыкулъ 31.

О заповеданью речей рухомыхъ, в захованью чыемъ будучыхъ.

Уставуемъ: где бы хто неоселый речы свои рухомые далъ кому в захованье, а инъшый, з стороны доведавшысе о тыхъ речахъ в захованью, приповедалъся ку тымъ речамъ, менуючи, ижъ тотъ исътый, хто тые речы зложилъ, ему должонъ, тогды тотъ г[о]с[по]д[а]ръ маетъ тые речы за заповеданьемъ врядовымъ учыненымъ у себе мети, а ихъ не выдавати до росправы до певного часу, надалей от часу арештованья за две недели, въ которомъ часе тотъ, хто оные речи заповедалъ, маетъ ся з нимъ передъ врадомъ тымъ, под которымъ тые речы заповедалъ, росправити. Ведъ же естли бы се то на праве показало, ижъбы без жадное слушное причины невинъне приводечы ку шкоде сторону противную, тые речы его арештовалъ, тогды урядъ, передъ который ся тая справа приточытъ, маетъ тому тые речы заарештованые водле уваженья своего и подле часу, особы и далекости дороги шкоды на том, который речы невинне арештовалъ, сказати и отправу вделати. А ведъ же оселого маетность нигде арештована быти не мает, а где бы, заарештовавъшы, в тыхъ дву неделяхъ росправы не принемъшы, самъ прочъ от[ъ]ехалъ, ино тые речы, которие заповедалъ, маютъ оному выданы быти, чые суть. А тотъ г[о]с[по]д[а]ръ домовый никоторое трудности и шкоды поносити не маетъ.

 

РОЗДЕЛЪ ОСМЫЙ. «О ТЕСТАМЕНЪТОХЪ».

 

Артыкулъ 1.

 

Хто можеть и не можеть о речахъ своихъ рухомыхъ тестаментъ чынити.

 

Уставуемъ, ижъ кождый маеть мети моцъ о речахъ своихъ рухомыхъ тестаментъ чинити, окромъ тыхъ паръсонъ, нижей описаныхъ, которые парсоны, ижъ подле права не мають ничого волного, для того тестаментомъ никому ничого отдати не могуть. Напервей, дети, летъ зуполъныхъ не маючие; законъники, будучы в законе упривил[ь]еваном, принемши и потверъдившисе в законе; сынове, от отца не выделеные, окромъ речей набытья своего власного або выслуги, такъ тежъ в чужую моцъ с права выданые, то естъ тот, кого бы кому выдано зъ его статъки и маетъностью; полоненики и челядь дворная; по тому жъ люди шаленые, которые от розуму отходили. А вед же и тые, коли ку доброму и досконалому розуму прийдуть, моцни тэстаменъты свои чынити. Такъ же выволанъцы и чсти отсужоные не могутъ тестаменътовъ чинити.