О року завитомъ на выездъ подъкоморого, и хто бы на немъ за причынами правными не сталъ.

Уставуемъ, ижъ кождый рокъ выезду подъкоморого на кгрунтъ маеть быти завжды завитый. Ведь же где бы сторона, позваная на тотъ рокъ, за позвы подъкоморого зложоный, за правъдивою обложъною хоробою або за послугою нашою, г[о]с[по]д[а]ръскою и речы посполитое, в семъ статуте выражоною, стати не могла, с тыхъ прычынъ маеть быти вольна от того перъшого року, але о хоробе своей, если се перед рокомъ прыдасть, также и о послузе, маеть в часъ, яко наборъздей быти можеть, подъкоморому и стороне передъ рокомъ запозваным ознаймити такимъ обычаемъ, яко около такихъ обмовъ наука в розделе четвертомъ естъ постановена, абы вжо того року не пильновали, а подъкоморый повиненъ будеть рокъ на иньшый часъ за тыми жъ першыми позвы от року, за ними припадаючого, такежъ за недель шест[ь] преложыти и то стороне позваной черезъ того жъ ее посланьца, которого к нему с тою обмовою прышлеть, листомъ своимъ ознаймити. А сторона позваная стороне жалобной черезъ листъ подъкоморого виньна будеть о томъ преложенью року ведати дати того жъ часу скоро по обмове своей, надалей за тыдень албо, яко на часъ и далекостъ местъца знесеть, покладаючы черезъ возного копею з листу подъкоморого на томъ именью, с которого споръ о земълю идеть.

А если хороба припадеть близко передъ рокомъ выезду подъкоморого, тогды и на самомъ року. можеть такое отроченье ити, а подъкоморый рокъ на инъшый час, яко вышей описано, преложити маеть, за которымъ преложеньемъ на другомъ року сторона, которая на першомъ року не стала, повинъна будеть первей водлугъ статуту прысегою правдивое обложное хоробы своее довести. И если обмова хоробою будеть чынена на самомъ року, тогды въ присязе и то доложоно быти маеть, ижъ его в такъ близкомъ часе хороба зашла, же не могъ передъ рокомъ о хоробе подъкоморому и стороне дати знати, а о послузе нашой земской сведецьство слушное на листехъ нашихъ оказати, а потом з стороною противною росправу судовную наконецъ прыняти. По тому жъ и стороне поводовой такие обмовы ити, и она се в таких прыпадкохъ водлугъ того, яко о позваномъ вышей естъ описано, заховати маеть. А где бы которая сторона на хоробе прысегнути не хотела або о послузе сведецъства водлугъ сего статуту не оказала, таковая речъ свою тратить, а подъкоморый то, о што межы ними идеть, стороне, року пилнуючой, безъ доводу сказати маетъ. Пакли бы хто и на другомъ року за позвы подъкоморого хоръ былъ, таковый, если не самъ, тогды черезъ умоцованого своего, предъсе права пилен быти и передъ подъкоморым на кгрунъте становитисе и росправу водлугъ права прыймовати виненъ будеть. А если с права присега тому, хто хоръ, сказана будет, тогды светки его тамъ на местъцу передъ подкоморымъ заразомъ прысегу учинити винъни будуть, а ку пригледанью прысеги самого хорого маеть подъкоморый возного з двема шляхтичами, кого собе тая сторона, которая, хоробою будучы, прысегати будеть, упросить и в домъ оного послати, а сторона противная и своихъ посланъцовъ при той присязе можеть мети, и возного, а оный хоры [так!] повиненъ будет яко на хоробе своей, же былъ и естъ хоръ, такъ и на речы самой, если ее всхочеть одержати, присегу перед тымъ вознымъ и шляхтою учынити. А не прысягнетъ ли, таковый речь свою тратить. Если бы тежъ хто хотелъ се на першомъ року за позвы подкоморого вымовляти позваньемъ до иншого повету и суду, тогды таковая обмова, яко на року завитомъ, не маеть быти приймована, вынявшы толко тые причыны, где бы хто на тотъ же одинъ рокъ былъ позван в ыншом повете также о кгрунтъ земъленый. Позвы подъкоморого на завитый рокъ о речъ болшую важнейшую або теж до суду кгродского, буд[ь] и в ыншомъ повете або и в томъ одномъ, в такой речы, где о горло идеть, и рокъ бы ему на тот же одинъ часъ у кгроду, яко и передъ подкоморымъ припадалъ, тогды в такомъ припадъку сторона такова захована будеть водлугъ арътыкулу двадъцат[ь] семого в розделе четвертомъ. Можеть тежъ обмова противъ року за позвы подъкоморого ити и такъ сторонамъ, в праве стоячымъ, яко и сумежникомъ тымъ, кгды хто с пановъ радъ нашыхъ водлугъ повинъности своее, або хто иный для потребъ и справъ своихъ судовыхъ, на съемъ припадаючыхъ, албо тежъ, с которого повету в поселъстве будучы отправенымъ, на съемъ поедеть. Вед же тое бытности своее на сойме маеть сведецьство на писме слушное, за печатью нашою, на другомъ року за позвы подъкоморого показати, а не покажет ли, тотъ речъ свою тратить. Еще тежъ суды подъкоморъские ити не мають часу поветрея морового и подъ войною, которая бы была з уфалы соймовое посполитымъ всихъ рушеньемъ отправована.