Дебиеттер мен нақты мәліметтерді жинақтау

Жұмысты жазуға керекті әдебиеттер мен нақты мәліметтерді студент өзі ізденіп, жинақтап алады. Бастапқыда тақырыпқа байланысты қабылданған заңдар мен ресми шешімдерді, одан соң ғылыми еңбектер, әдебиеттер, интернет пен ақпарат құралдарында жарияланған нақты мәліметтерді оқығаны дұрыс.

Жұмысты жазу барысында нақты мәліметтердің негізгі көздері ретінде – Қазақстан Республикасының Конституциясын, Қазақстан Республикасының инвестиция қызметін реттейтін заңдары мен басқа да нормативтік-құқықтық актілерін, Қазақстан Республикасы Президентінің жарлықтарын, сондай-ақ шетелдік және отандық оқулықтарды, Қазақстан Республикасы статистика жөніндегі Ұлттық Агенттігінің жыл сайын шығаратын статистикалық жинақтарын пайдалануға болады. Сонымен қатар, инвестиция, ақша, банк, бағалы қағаздар, қаржы нарығы туралы көп мағлұматтарды Ұлттық банктің статистикалық бюллетені, мерзімді журналдар және газеттер де жариялайды. Бұлармен де жете танысқан абзал.

Ол үшін университет кітапханасындағы каталогтарды қарап, мәлімет–ақпараттардың басылып шыққан уақытына көңіл бөлген жөн. Бірінші кезекте соңғы уақытта жарық көрген деректерді, мәліметтерді таңдап, пайдалану керек. Таңдалып алынған әдебиеттер мен мәліметтерді дәптерге немесе карточкаларға жазып, курс жұмысының жоспарына сай топтастырып, алфавит бойынша тізім жасаған дұрыс. Тізім төмендегі үлгімен жазылады:

– автордың фамилиясы және аты-жөні;

– кітаптың алғы бетіндегі нақты атауы;

– томы, басылған жері, жылы және қаншасыншы бет. Мысалы: Шарп У. Инвестиции. – М., «Инфра – М», – 2001 ж. – 18-19 б.

Журналға, газетке шыққан мақалалардың тізімі:

– автордың фамилиясы және аты жөні;

– мақаланың атауы;

– журналдың немесе газеттің атауы, оның шыққан жылы және нөмірі, газеттің шыққан айы және жұлдызы жазылады. Мысалы: «Инвестициялар туралы» 2003 жылғы 8 қаңтардағы № 373 – ІІ Қазақстан Республикасының Заңы // Егемен Қазақстан газеті. – 2008 ж. – № 7 (603) – 11 қаңтар.

Керекті әдебиеттерді, мәліметтерді жинақтап алған соң ғана оларды зерттеуге кірісу керек. Сонымен қатар зерттелетін тақырыпқа байланысты арнайы жазылған оқулықтар және ғылыми жинақтармен де танысқан дұрыс.

Қоғамдағы болып жатқан экономикалық мәселелер туралы тек жан-жақты зерттеліп, талданған нақты мәліметтер ғана ғылыми негізделініп дұрыс қорытынды беретіні анық. Сондықтан сол ақиқат ақпараттарды талдау арқылы ғана теория мен практиканың терең және өзара байланысын айқындауға мүмкіндік туады. Бұрыннан белгілі, егер теория практикаға жол ашса, ал практика теорияның дұрыстығын дәлелдеп, экономикалық танымды тереңдетеді. Демек, экономикалық құбылыстарды айғақтайтын нақты және статистикалық мәліметтерді жинақтауға аса мұқият көңіл бөлген жөн. Курс жұмысын жазуға ұлттық экономиканы сипаттайтын макрокөрсеткіштермен қатар жергілікті микроэкономикалық мәліметтерді де кеңінен қолдануға болады.