Молитва блаженной инокине Параскеве
Тропарь блаженной инокине Параскеве, глас 4 Иноческое и равноангельское житие возлюбивши, и во след Христа, Жениха твоего, усердно потекши, Того благое иго в юности твоей прияла еси, подвигом юродства Христа ради подвизалася еси, постническими подвиги, странствием и молитвами, и слезными каплями углие безбожия угасивши, блаженная мати Параскево: и ныне в небесном чертозе предстояши Христу, моли о нас, почитающих честную память твою. Кондак блаженной инокине Параскеве, глас 3 Блаженная инокине Параскево, паче жития Христа возлюбившая, во странствии земном подвигом юродства Богу послужившая, ризою бесстрастия украсившаяся, правыя веры чистоты ревнительнице, моли Христа Бога спастися душам нашим. Величание блаженной инокине Параскеве Ублажаем тя, блаженная мати Параскево, и чтим святую память твою, ты бо молиши о нас Христа Бога нашего. Молитва блаженной инокине Параскеве О, блаженная мати Параскево, обители Старобельския похвало, града Лисичанска украшение и неба церковнаго звездо светлая! Ты подвигом добрым иноческого делания и юродством Христа ради добре подвизалася еси, и многия люди твоими наставлениями и чудесы от безбожия и неверия на стезю покаяния, правыя веры и христианского благочестия наставила еси. Приими нас, грешных, под твое сильное заступление прибегающих. Испроси у Всещедраго Человеколюбца Христа Бога нашего, да не помянет беззаконий наших, но да помилует нас и сотворит с нами по милости Своей: да дарует нам здравие душевное и телесное, благоденствие и в потребнем изобилие, наставляя нас обращати вся в славу Его, Творца, Спасителя и Бога нашего, по кончине же временныя жизни нашея от немилосердных истязателей на воздушных мытарствах да избавит нас, и сподобит нас достигнути, тобою водимыя и покрываемыя, Горняго онаго Иерусалима, егоже славы и красоты с лики ангелы наслаждаешися. О, святая преподобная мати Параскево! Сохрани вся грады и веси страны нашея, храм сей [или: обитель сию], служащих и молящихся в нем[или в ней], от глада, губительства, труса и потопа, огня и меча, нашествия иноплеменных и междоусобныя брани; избави всех нас от всякия беды и напасти и молитвами твоими отврати от нас праведный гнев Божий, и Его милосердие нам испроси, да вкупе с тобою сподобимся прославляти в невечернем дни пресвятое имя Отца и Сына и Святаго Духа во веки веков. Аминь.
|
