Пакли бы хто сумы п[е]н[е]зей, от которого колвекъ вряду нашого земского або кгродского, будь тежъ подъкоморъского або комисаръского, присужоное, албо пакъ з нашого, г[о]с[по]д[а]ръского, любо тежъ судей головныхъ выруку [так!] на отправу до вряду отосланое, будь заразом по сказанью водле описанья сего статуту або на роки, в нем вышей описаные и узычоные, стороне своей противной не заплатилъ, тогды возный, от вряду нашого на увязанье стороне жалобной приданый, маеть с трема шляхтичами, веры годными, для того увязанья до именья стороны противное, на ком што сказано будет, ехати и сторону жалобную водлугъ листу увяжчого за суму, ей сказаную, в люди, именье, кгрунты и инъшую маетность стороны противное водлугъ порядъку и науки, в семъ статуте около того нижей описаное, увезати и то ему в деръжанье до заплаты сумы п[е]н[е]зей подати. А где бы хто возному увязанья не поступилъ и боронилъ самъ або через врядника, тивуна, слугъ, бояръ и подъданыхъ своихъ и через кого кольвекъ иного, не толко учынком якимъ спротивенство показуючы, але хотя словне мовечы, же не поступуеть увязанья, и то бы возный и с тою стороною трема шляхтичы згодне передъ врядом земъскимъ або кгродскимъ сознали, тогды таковы [так!] противникъ вжо в заруку, на листе увяжчомъ описаную, попадаеть. А врядъ тотъ, который будеть тую реч судилъ албо до которого от насъ, г[о]с[по]д[а]ра, албо от головного суду на отправу отослано будеть, естли земъский, тогды судья або подъсудокъ, а естли врядъ кгродский, тогды воеводове, старостове або ихъ наместъники, подъстаростий або судья кгродъский, маючы при собе возных двухъ того жъ повету и пети шляхътичов, оселых в томъ паньстве, великом князъстве, людей добрыхъ, веры годныхъ и ни в чомъ не подойзроныхъ, о которую сторону жалобная сторона старатися повинна, мает на тое увязанье ехати от данья ему знать через того возного, первей на увязанье посланого, надалей за чотыри недели, и тамъ сторону поводовую яко за тую суму, с права сказаную, такъ и за заруку, в листе увяжчомъ положоную, въ именье противника увязати и на конецъ отправу на немъ водлугъ порядъку сего статуту учинити, заховуючыся в томъ увязанью противко обеюмъ сторонамъ верне, правдиве, подъ тою жъ присегою своею, на врядъ его учиненую. А хотя бы по всказанью врядовомъ тотъ самъ, противъ кому сказанье выйдеть, або на комъ што присужоно будеть, перъвей ним до увязанья прийдеть, умеръ, тогды возный або врядъ самъ без жадного иншого припозыванья, але за тымъ же сказаньемъ отправу и увязанье противъ детей, потомковъ и близскихъ его водлугъ порядъку сего статуту выконывати маеть. Где бы тежъ тотъ, хто презыскъ одеръжить, не взявши заплаты, и первей увязанья з сего света зшолъ, тогды детямъ, близскимъ его, кому бы тотъ презыскъ за правомъ прирожоным албо тежъ обчому кому за записомъ належалъ, также без позыванья, толко лист увяжчий отменивши, отправа чинена быти мает. А за працу тому вряду самому увяжчого от копы два грошы тот, на ком отправу чинять, платити мает, и вряд за тотъ свой доход особливе в люди або земли виноватого увезатися и стороне той жалобной або кому иному в том завести может. А кгды прийдет увязывати у власное именье стороны жалобное, близкостью або якимъ инымъ правомъ презысканое, або в люди, кгрунты, кромъ такого именья, которое бы было кгвалтовне зъ спокойного деръжанья отнято, о чомъ естъ наука в особливыхъ арътыкулехъ. Тогды врядъ около увязанья в тое именье тым же порядъкомъ, вышей описанымъ, заховатися маеть. Одно жъ за працу вряду увяжчого вжо сама сторона поводовая от службы або волоки, оселое людми, по два грошы, а от дворъное и пустовъское пашное земли або волоки по одному грошу платити будеть, а от инъшыхъ кгрунтовъ, которые бы ся на пашню не згодили, ничого платити не будеть винъна. А тую отправу врядъ в томъ часе, вышей замерономъ, выконывати маеть подъ виною петмадесятъ копами грошей стороне поводовой, о которую вину врядъ до тых жо судей головныхъ позванъ быти маеть, а по заплате вины предъсе тую отправу чинити виненъ будеть.
