В СРЕДУ 5-й НЕДЕЛИ ВЕЛИКОГО ПОСТА СЛОВО... ВЕЛМИ ДУШЕПОЛЕЗНО, О ПОКОИ ВСЕГО МИРА

 

...Богородица, хотящи дабы видела, како ся душа мучать, и рече Михаилу архистратигу: "исповемся[42], исповеждь[43] ми, яже суть на земли всяческая". И рече к ней Михаил: "яко же... речеши, благодатная, аз всяческая тебе исповем". И рече к нему святая Богородица: "колко есть мук, идеже мучится род христьянский?" – И рече к ней архистратиг: "неизрекомыи суть мукы". – Рече же к нему благодатная: "исповежь ми на небеси и на земли".

И повеле архистратиг явитися ангелом от полудне[44], и отверзеся ад, и виде во аде мучащаяся, и бяше ту множство муж и жен, и вопль мног бяше. И воспроси благодатная архистратига: "кто си суть?" – И рече архистратиг: "сии суть, иже не вероваша во отца и сына и святаго духа, но забыша Бога и вероваша юже ны бе тварь Бог на работу сотворил[45], того они все Богы прозваша: солнце и месяць, землю и воду, и звери и гади... Трояна, Хорса, Велеса, Перуна на Богы обратиша, бесом злым вероваша и доселе мраком злым содержими суть, того ради зде тако мучатся..."

И виде на друзем месте тму велику, и рече святая Богородица: "что есть тма сии, и кто суть пребывающи в ней?" – И рече архистратиг: "многи душа пребывают в месте сем". – И рече святая Богородица: "да отымется тма сии, да бых видела и ту муку". И отвещаша ангели, стрегущии муку: "поручено ны есть, да не видять света, дондеже явится сын твои благыи, паче 7 солнць светлийши". И прискорбна бысть святая Богородица, и ко ангелом возведе очи свои, и возрев на невидимый престол отца своего, и рече: "во имя отца и сына и святаго духа, да отимется тма сии, и да бых видела сию муку". И отъятся тма си, и 7 небес явися, и ту пребываше множство народу, мужь и жен, и вопль многии бысть, и глас велик исхожаше. И видевши я[46] пресвятая Богородица и рече к ним плачющися со слезами: "что сотворили есте, бедницы[47] окаянии, недостойнии, како вы семо приидосте?" И не бысть гласа от них, ни ответа, и рекоша ангели стрегуще: "почто не глаголите?" Рекоша мучащиися: "о благодатная, от века несмь света видели, да не можем зрети горе". И возревши на ня[48] святая Богородица и восплакася велми. И видевши ю[49] мучащиися и рекоша к ней: "како ны еси присетила[50], святая Богородица, но сын твой благодатный на землю приходить, и не воспроси нас, то ни Авраам прадед, ни Моисеи пророк, ни Иоанн креститель, то ни апостол Павел, возлюбленник божии, но ты, пресвятая Богородица, заступнице, – ты еси роду христьянскому стена, ты молишь Бога. Како еси нас присетила бедных?" Тогда рече святая Богородица ко архистратигу Михаилу: "что есть согрешение тех?" – И рече Михаил: "сии суть, иже не вероваша во отца и сына и святаго духа, то ни в тя, святая Богородица, не хотяща проповедати имени твоего, якоже родися от тебя наш Исус Христос, плоть приим, освяти землю крещением, – да того деля[51] в том месте мучатся". И паки прослезися святая Богородица и рече к ним: "почто ся соблазнисте, не весте ли вы, якож мое имя чте все создание?"

То рекше святая Богородица, и паки тма нападе на них. Рече к ней архистратиг: "куды хощешь, благодатная, да изидем – на полудне или на полунощ[52]?" – И рече благодатная: "изыдем на полудни". – Тогда обратишася херувимы и серафимы и 400 ангел, изведоша Богородицу на полудень, идежь река огненая исхожаше, и ту бяше множство муж и жен, бяху погружении ту, овии до пояса, овии до пазуху, овии до шии, а друзии до верха. И видевше святая Богородица, возопи гласом великим и воспроси архистратига: "которыи суть си, иже до пояса во огни погружении?" – И рече к ней архистратиг: "се суть, иже отець и матерей своих клятву[53] прияша, да за то зде мучатся, яко прокляти суть". – И паки рече Богородица: "иже суть под пазусе в огни, котории суть?" - И рече к ней архистратиг: "сии суть присныя[54] куми были карящеся[55], а другии блуд творяху, да за то ти зде мучатся". И рече пресвятая Богородица: "а иже суть до шия во пламени огню, котории суть?" – И рече к ней архангел: "сии суть, иже мяса ядшая человеча, да за то зде мучатся тако". – Рече святая Богородица: "а сии до верха суть ввержении во пламени огню, которыи суть сии?" – И рече архистратиг: "си суть, госпоже, иже крест честный держаще, кленутся лжами, – таковыми силы честнаго креста, егоже ангели зряще трепещут и со страхом поклоняются ему, – тогож человецы держаще, кленутся им, не ведуще, какова мука ожидает их; того ради тако мучатся".

И увиде святая Богородица мужа висяща за нози, и червии ядяху его, и воспроси ангела: "кто сей есть? что ли грех сотворил есть?" – И рече к ней архистратиг: "сий есть, иже приклады[56] имаше на злато свое и на сребро, да за то на веки мучится".

И виде жену висящу за зуб, и различныя змия исхожаху изо уст ея и ядаху ея. И видевши пресвятая, и воспроси ангела: "что есть жена сии, что ли грех ея? – И отвеща архистратиг и рече: "та есть, госпоже, еже хожаше по ближная своя и по суседом, послушающи, что глаголют, и слагающи словеса неприязнена, сважающии на сваре[57], да того ради сице мучится". И рече святая Богородица: "добро было человеку тому, да ся бы не ражал".

И рече к ней Михаил: "и еще, святая Богородица, несть видела великих мук". – И рече святая ко архистратигу: "изыдем да походим, да видим вся муки". – И рече Михаил: "куды хощеши, благодатная?" – И рече святая: "на полунощь". И обратишася херувими и серафими и 400 ангел, изведоша благодатную на полунощь, и бысть облак огнен распростерт, посреди его одрове[58], яко пламеный огнь, и на них лежаше множство муж и жен. И видевши святая, и воздохнув, и рече ко архистратигу: "кто си суть, что суть согрешили?" – И рече архистратиг: "сии суть, госпоже, иже во святую неделю на заутреню не воставають, но ленящеся лежать, яко мертви, да за то те мучатся". – И рече святая Богородица: "да аще кто не может встати, да что сотворили?" – И рече Михаил: "послушаи, святая, аще кому загорится храмина на четверо[59], и обыдеть и[60] огнь и згорит не мога востати, таков не имать греха"...

И увиде святая Богородица древо железно, имеюще отрасли и витвии железныи, и вершие[61] ветвия того имеяше уды железныя, и бяше множество висящии, муж и жен, за языки. И видевше святая, прослезися и воспроси Михаила: "кто си суть, что [ли] согрешении их?" – И рече архистратиг: "и се суть клеветницы и свадницы[62], иже разлучиша брата от брата и мужь от жен своих"...

И виде пресвятая жены висяща за вся ногти, и пламени исхожаше изо уст их и опаляше вся, и змия исхожаше из пламени того и прилепяху к ним, и вопияху, глаголаше: "помилуйте нас, яко едины мучимся паче всех мук". – И рече святая, прослезившися: "что есть согрешении тех?" – И рече архистратиг: "то суть попадьи, иже попов своих не почтоша и по смерти их идоша за муж, да того ради мучатся".

И виде другия жены во огни лежаща, и различныя змия ядаху их, и рече святая: "что согрешение их?" – И отвеща Михаил: "то суть монастыря черницы, яже телеса своя продаша на блуд, да того ради зде мучатся".

И рече архистратиг: "поди, пресвятая, и покажу ти, где ся мучит множство грешник". И виде святая реку огненую, и видение реки тоя яко кровь текущи, и пояда всю землю, и посреде волны тоя множство грешник. И видевши Богородица, прослезися и рече: "что есть согрешение их?" – Рече архистратиг: "то суть блудницы и любодеицы, татие[63], ниже послушають отаи[64], что суть ближнии глаголять, свадницы и клеветницы... пьяницы, немилостиви князи, епископи и патриарси, и цари, иже не сотвориша воля божия, сребролюбци, иже лихву емлют[65], беззаконницы". Слышавше то, пречистая Богородица прослезися и рече: "люте грешником!" – и рече ко архистратигу: "тяжко согрешающим, да бы ся не ражали[66].

И рече к ней Михаил: "почто ся плачеши, святая, неси ли видела[67] великих мук". И рече пресвятая: "поведи мя, да вижю вся мукы". – И рече к ней Михаил: "куды хощеши, благодатная, да изыдем – на восток или на запад или в раи, на десно или на лево, идеже суть великия муки?" – И рече пресвятая: "изыдем на левую страну". Слово рекше пресвятей, и обратишася херувими и серафими и 400 ангел, изведоша пресвятую от восток на левую страну, и близ тоя реки бяше тма мрачна: ту лежаше множство муж и жен и клоктаху яко в котле и яко морския волны, и ображаются[68] над грешники, да егда волны возхождаху, и погружаху грешники 1 000 локоти, не можаху рещи: "праведныи судья, помилуи ны". Ядяше же червии неусыпаяи, и скрежет зубом. И видевше пресвятую ангели стрегуще, и возопиша вси едины усты, глаголяще: "свят, свят, свят еси, боже святый, и ты, Богородице, благословим тя и сына божия, родившагося от тебе, яко бо от века не видехом света и днесь видим свет тебе ради, Богородице". И паки возопиша вси единем гласом, глаголюще: "радуйся, благодатная Богородица; радуйся, просвещение света вечнаго; радуйся, святыи архистратиже Михаиле, моляся владыце за весь мир, мы убо видим грешныя мучащияся и зело скорбим". Видевши Богородица ангелы скорбныи и уныли грешник ради, и возплакася пресвятая, и возопиша вси единым гласом, глаголюще: "добре есте пришли во тму сию, да не видить како ны есть мука; помолись, пресвятая, со архистратигом". И слыша плач и глас грешных, воздвигоша плач, свои, вопиюще и глаголюще: "господи, помилуй ны", да яко опростиша[69] молитву, уставися[70] буря речная и волны огненыя, и явишася грешницы, яко зерна горочная[71]. И видевши святая, прослезися и рече: "что есть река си и волны ея?" – И рече к ней архистратиг: "сии река вся смолена, а волны ея вся огнены, а иже ся мучат, то суть жидове, иже мучиша господа нашего Исуса Христа, сына божия, и вси языцы, иже крестишася во имя отца и сына и святаго духа, иже крестьяне[72] суще, ти верують в демоны и отвергошася Бога и святаго крещения, и еже блуд створиша по святом крещении, и с кумы своими и с матерьми своими и со щерьми[73] своими, и отравницы, иже ядями уморяють человеки, и оружьем убивают человеки, и давят дети своя, и того ради мучатся противу делом своим". – И рече святая: "по делом их буди тако". И паки наиде на ня бурна река и огненыя волны, и тма покры я. И рече Михаил к Богородицы: "аще ся кто затворит во тме сей, несть памяти о нем от Бога". – И рече пресвятая: "о люте грешником, яко неусыпаемыи есть пламы огня сего!"...

И рече пресвятая ко архистратигу: "при единои молитве молютися, да вниду и аз, да ся мучу со крестьяны, понеже нарекошася чада сына моего". – И рече архистратиг: "почиваи в раи". – И рече пресвятая: "молю ти ся, подвигни воинства 7-ми небес и вся воинства ангели, да ся помолим за грешники, не бы ли нас услышал[74] Господь Бог и помиловал их". – "Жив Господь Бог, имя его велико, 7-жды на день и 7 на нощь, егда хвалу приносим владыце и за грешники, госпоже, господеви поклоняемся, да ни худе нас послушает владыка". И рече пресвятая Богородица: "молимтися, повели ангельскому воинеству, и вознесете мя на высоту небесную и поставите мя пред невидимым отцем". И повеле архистратиг, и предсташа херувими и серафими, и вознесоша благодатную на высоту небесную, и поставиша ю пред невидимым отцем у престола, и возде руце свои ко благодатному сыну своему, и рече: "помилуи, владыко, грегшыя, яко видех я, и не могу терпети, да ся мучю и аз со крестьяны". И прииде глас к ней, глаголя: "како хощу тыя помиловати? а вижу гвоздия во дланех сыну моему, да не имам како я те помиловати". – И рече: "владыко, не молюся за неверныя жиды, но за крестьяны молю твое милосердие". – И прииде глас, глаголя: "аз вижу, яко братия моея не помиловаша, да несть ми како тех помиловати". – И рече паки пресвятая: "помилуй, владыко, грешныя; помилуй, господи, тварь руку своею[75], яко по всей земли твое имя нарицают и в муках, и на всяком месте, и по всеи земли глаголюще: пресвятая госпоже Богородице, помогаи нам, и егда ражается человек, и глаголеть: святая Богородице, помози ми". Тогда рече к ней Господь: "послушай, пресвятая Богородице, владычице, – несть того человека, иже не молить имени твоего; аз же не оставляю тех то ни на небеси, ни на земли". – И рече пресвятая Богородица: "где есть Моисеи пророк, где ли суть вси пророцы, и вы, отци, иже греха не сотвористе николиже; где [ли] Павел возлюбленик божий; где есть Неделя, похвала христьянская; где ли есть сила честнаго креста, иже Адама и Иевгу от клятвы избави?" - Тогда Михаил архистратиг и вси ангели рекоша: "помилуй, владыко, грешныя". Тогда Моисеи возопи, глаголя: "помилуй, владыко, яко аз закон твой дах им". Тогда Иоанн возопи, глаголя: "помилуй, владыко, аз евангелие твое проповедах им". Тогда Павел возопи, глаголя: "помилуй, господи владыко, яко аз епистолья[76] твоя приях церквам"... Тогда вси святии, слышавше владыку глаголюще, не смеша что отвещати.

И видевше пресвятая, яко вси не успеша ничтоже и Господь святых не послуша, но удаляеть милость свою от грешник, и рече пресвятая: "где есть архистратиг Гаврил, иже возвести мне: радуися, якоже преже всех век внемляше отца, и ныне на грешники не призираеть?.. где суть служители престолу, где есть Иоанн Богословець? почто не явистеся с нами на мольбу владыце за крестьяныя грешники? не видите ли мене плачющуюся за грешныя? Приидете вси ангели и сущии на небесех; приидети вси праведнии, яже Господь оправди[77], и вам дано есть молитися за грешныя. Прииди ты, Михаиле, – ты еси первый безплотным до престола божия, – повели и всем, да припадем пред невидимым отцем и не подвижем[78] себе, дондеже послушает нас Бог и помилует грешныя". Тогда падеся Михаил ниц лицем своим пред престолом, и вся лики небесныя, и вси чини бесплотных. И виде владыко молбу святых, умилосердися сына ради своего единороднаго и рече: "сниди, сын мой возлюбленный, виждь молбу святых и яви лице свое на грешники".

И сшед Господь от невидимаго престола, и увидеша и во тме сущии, и возопиша вси единым гласом, глаголюще: "помилуй ны, сыне божий; помилуй ны, царю всех век". – И рече владыко: "слышит вси, – рай насадих и человека создах по образу своему и поставих и господина раеви, и живот вечный дах им, они же ослуху створиша и в своем хотении согрешиша, и предашась смерти; аз же не бых хотел обозрити[79] дела руку своею мучима от диявола, снидох на землю и воплотихся во девицу, и вознесохся на крест, да свобожу ся от работы[80] и от первыя клятвы; води испросих, и даша ми желчи со оцетом[81] смешено; руце мои создаста человека, – и во гроб вложиша мя; да и во ад снидох и врага своего попрах, избраны своя воскресих, Иордан благослових, да вы[82] прощу от первыя клятвы, – и вы небрегосте[83] покаятися грехов своих, но крестьяне ся творяще словом точию, а заповедей моих не соблюдосте; да того ради обретостеся во огни негасимом да не имам вас помиловати. Ныне же за милосердие отца моего, яко посла мя к вам, и за молитвы матери моея, яко плакася много за вас, и за Михаила архистратига завету[84] и за множество мученик моих, яко многа трудишася за вас, – и се даю вам мучащимся день и нощь от великаго четверга до святыя пянтикостия[85], имете вы покои и прославите отца и сына и святаго духа". И отвещаша вси: "слава милосердию твоему".

Слава отцу и сыну и святому духу, и ныне и присно и во веки веком. Аминь.