Кіріспе. Гистология – 1 бағдарламасына цитология, эмбриология және жалпы гистология пәндері кіреді

Гистология – 1 бағдарламасына цитология, эмбриология және жалпы гистология пәндері кіреді. Жалпы гистология, цитология және эмбриологияның бір пән болып бірігуі жай ғана емес, бұл пәндер өзара тығыз байланысады.

Гистология – 1 тірі материяның тіндік деңгейіндегі құрылымдық ерекшеліктерінің жалпы заңдылықтарын зерттейді. Тіндер мүшелердің және олардың морфофункционалдық бірліктерінің дамуына, құрылымына және тіршіліге қажетті элементтер болып табылады.

Гистология – 1 медико-биологиялық ілімдер жүйесінің ішіндегі болашақ дәрігерлерге фундаменталды – теориялық білім беретін пәндердің бірі болып табылады. Гистология – 1 жалпы тіндердің тіндік құрамының және мүшелердің құрылысындағы ерекшеліктерін жалпы даму заңдылықтарымен байланыстыра отырып зерттейді. Мүшелердің құрамындағы жасушалары мен тіндердің қалыпты жағдайдағы құрылысын, даму ерекшеліктерін білу, бұлардың әр түрлі биологиялық, физикалық, химиялық және тағы да басқада сыртқы әсерлерге қарсы тұрарлық қабілетін білу өте маңызды. Осыған байланысты гистологиялық зерттеу объектісі болып тірі және бекітілген жасушалар мен тіндер, олардың жарықтық және электронды микроскопиялық зерттеулерден алынған кесінділері мен микросуреттері жатады.

Қазіргі кезде гистологияның дамуы физика, химия, математика және информатика ілімдерінің жоғарғы деңгейдегі жетістіктеріне тығыз байланысты. Гистология медицина саласының ішіндегі маңызды орын алатын, әрі адам ағзасының құрылымдық-қызметтік негізіне, өмір бойғы тіршілігі мен патологиясына талдау беретін ілімдердің бірі болып саналады.

2. Пәннің мақсаты:студенттерде жасуша мен тіндердің, мүшелердің құрылысындағы құрылымдарының өмір тіршілігінде өтетін көптеген процестердің заңдылықтарын және олардың пайда болуын, дамуын, оған, белгілі бір мақсатта әсер етуге қажетті фундаменталды теориялық білімдерін қалыптастыру.

3. Оқыту мақсаттары:

· жасуша мен оның туындыларының құрылыс - қызметін анықтай білу;

· тіндердің гистогенезін, құрылысын, гистофизиологиясын, регенерациясын анықтай білу;

· әр түрлі мүшелердегі тіндердің арнайы атқаратын қызметтеріне байланысты ерекшеліктерін ажырата білу;

· микроскопиялық деңгейде гистологиялық препараттарда тіндерді ажырата білуге дағдыландырып, қалыптастыру.