Пәннің мақсаты:
Қазақстан тарихы курсының мақсаты – Қазақстанның ежелгі заманнан бастап бүгінгі күнге дейінгі даму тарихынан студенттердің жүйелі білімдерін қалыптастыру. Студенттердің бойындағы қазақстандық патриотизмді, азаматтық сезімді дамыту.
Пәннің міндеттері:
- Студенттердің басты назарын қоғам тарихына: адамдардың өмір тіршілігі мен қызметіне, салт-дәстүр тарихына аудару;
- Тарихи оқиғаларды, құбылыстарды талдай отырып, олардың біртұтас тарихи қозғалысқа жататынын түсінуге көмектеcу;
- Студенттердің бойында өз халқы мен өзге халықтардың тарихы мен мәдениетін құрметтей білу сезімін қалыптастыру, мәдени мұраны сақтауға және байытуға үлес қосуға тәрбиелеу;
- Адамгершілік тәрбиесін беру (қазақстандық патриотизм, ұлттық келісім ұғымдарын дұрыс қабылдау, үлкенге құрмет, кішіге жол көрсету).
- Еңбек тәрбиесін беру (еңбекке баулу, еңбек адамдарына құрметпен қарау, мамандыққа бағдарлау және экономикалық тәрбие).
- Дүниеге ғылыми көзқарас қалыптастыру, студенттерге адамзат жинаған әлеуметтік, рухани, адамгершілік тәжірибесін меңгерту.
Пәннің қысқаша мазмұны:
Қазақстан тарихы пәні курсы алғашқы қауымдық қоғам кезінен бастап қазіргі кезге дейінгі Қазақстан жеріндегі ең маңызды тарихи мәселелерді оқытады. Қазақстан жеріндегі алғашқы адамдардың тіршілігі мен ескерткіштерінің зерттелуі, алғашқы тайпа одақтары мен мемлекеттердің тарихы, ерте орта ғасырлардағы түркі тілдес тайпалық одақтардың мемлекеттерінің тарихы, қазақ халқының қалыптасуы және Қазақ хандығының құрылуы, көшпенділер қоғамының мәдени құндылықтары, Қазақстанның Ресей империясының отарына айналуы және оның салдарлары, тәуелсіздік жолындағы ұлт-азаттық қозғалыстар, Кеңес Одағы құрамындағы Қазақстанның әлеуметтік-экономикалық, саяси және мәдени дамуы, тәуелсіз Қазақстан Республикасының құрылуы және оның қазіргі кезеңдегі дамуы сияқты аса маңызды тарихи кезеңдерді қамтиды.
Пәнді меңгергеннен кейін студент келесі білімдер мен дағдыларды игеруі керек:
- Қазақстан тарихының аса маңызды кезеңдерін, ғылыми мәселелерін білуі;
- Қазақстан тарихының негізгі кезеңдерінің хронологиялық шегін білуі;
- Көшпелілер өркениетінің тарихтағы орнын, дүниежүзілік өркениетке қосқан үлесін білуі;
- Қазақстанда мемлекеттіліктің тууы, дамуы, қалыптасуы ерекшеліктерін білуі;
- Отан тарихында маңызды орын алатын тарихи тұлғалардың өмірін, атқарған қызметінің рөлін білуі;
- Тәуелсіз Қазақстанда болған қоғамдық-саяси, әлеуметтік-экономикалық, мәдениет, халықаралық қатынастар саласындағы өзгерістерді;
- Қазіргі қоғамдағы саяси, әлеуметтік-экономикалық, рухани, экологиялық және тағы басқа мәселелерді талдауда тарихи білімін еркін қолдана алуы тиіс.
