Науқастың дене қызуы көтеріліп, жалпы жағдайы нашарлайды, жара ісінеді, қызарады, қатты іріңдейді. Жараны ашып іріңнен тазартқаннан кейін науқастың жағдайы жеңілдегенімен, жарадан ірің ағу тоқтамаса ол сүйектің қабынуының белгісі. Рентгендік зертеуде әлі бітпеген, сынған сүйек ұштарында ұсақ секвестрлер, остеопороз анықталады. Атылған, оқ дәрілік остеомиелитте тін аралықтарында бытыра, оқ, снаряд бөліктері қалуы мұмкін. Жарақаттық остеомиелиттің ағымы гематогенді остеомиелитке ұқсас келеді: қабынудың жедел түрі созылмалы түріне ауысады. Созылмалы жарақаттық остеомиелит қабынудың рецидиві, ремиссиямен сипатталады. Сынған сүйек толық бітпей, ол арада жалған буын қалыптасады. Емі - хирургиялық операцияны қажет етеді. Сүйектің өліеттенген жерін (секвестрлерін), іріңді грануляцияларын, жыланкөздерін кесіп алып, санация жүргізіледі. Сынған сүйекті фиксациялау мақсатында салынған металлоконструкциялар (интамедулярлы, экстрамедулярлы остеосинтез) иммобилизацияны толық қамтамасыз ете алмаса, қабынудың таралуына себеп болса, оларды алып тастап, қабыну ошақтарынан тыс салынатын Илизаров апаратымен остеосинтез жасалған жөн. Сынған сүйек толық бітпей, жалған буын қалыптасса, сүйекке резекция жасап, Илизаров апаратын салу керек. Остеомиелит ошағы ауқымды болса сүйек резекциясынан кейін сүйекке аутотрансплантация операциясы істелінеді. 76-суретте остеотомия операциясының және Илизаров аппаратымен сүйек 
бөлігін орнынан жылжыту схемасы көрсетілген.
