Інфармацыйнай сістэме ўліку выпуску прадукцыі

 

Змест гаспадарчых аперацый і працэдур калацыі рахункаў, прыведзеных на малюнку 3.4, наступны:

1. Гарызантальныя інфармацыйныя сувязі рахункаў сінтэтычнага ўліку:

1а) спісаны фактычны сабекошт вырабленай гатовай прадукцыі;

1б) апрыходавана гатовая прадукцыя па планавым (нарматыўным сабекошце);

1в) спісана рэалізаваная пакупнікам гатовая прадукцыя па планавым (нарматыўным) сабекошце;

1г) спісана адхіленне фактычнага сабекошту вырабленай прадукцыі ад яе планавага (нарматыўнага) сабекошту.

2. Вертыкальная калацыя рахункаў сінтэтычнага і аналітычнага ўліку:

2а) выяўленне адэкватнасці інфармацыі сінтэтычнага рахунку 20 “Асноўная вытворчасць” аналітычным рахункам вытворчасці відаў прадукцыі;

2б) выяўленне адэкватнасці інфармацыі сінтэтычнага рахунку 40 “Выпуск прадукцыі (работ, паслуг)” аналітычным рахункам выпуску відаў прадукцыі;

2в) выяўленне адэкватнасці інфармацыі сінтэтычнага рахунку 43 “Гатовая прадукцыя” аналітычным рахункам матэрыяльна-адказных асоб;

2г) выяўленне адэкватнасці інфармацыі сінтэтычнага рахунку 90 “Даходы і расходы па бягучай дзейнасці” аналітычным рахункам рэалізацыі відаў прадукцыі.

3. Вертыкальная калацыя рахункаў аналітычнага ўліку:

3а) выяўленне адэкватнасці інфармацыі аналітычных рахункаў вытворчасці відаў прадукцыі калькуляцыйным артыкулам выдаткаў;

3б) выяўленне адэкватнасці інфармацыі аналітычных рахункаў матэрыяльна-адказных асоб аналітычным рахункам відаў прадукцыі;

4. Кантроль за выкананнем патрабавання несупярэчнасці даных паралельных сістэм аналітычнага ўліку:

4а) фактычных выдаткаў у разрэзе відаў прадукцыі, якія адносяцца да вырабленай прадукцыі па рахунках 20 “Асноўная вытворчасць” і 40 “Выпуск прадукцыі (работ, паслуг)”;

4б) нарматыўных (планавых) выдаткаў у разрэзе відаў прадукцыі, якія адносяцца да апрыходаванай прадукцыі па рахунках 40 “Выпуск прадукцыі (работ, паслуг)” і 43 “Гатовая прадукцыя”;

4в) нарматыўных (планавых) выдаткаў у разрэзе відаў прадукцыі, якія адносяцца да рэалізаванай прадукцыі па рахунках 43 “Гатовая прадукцыя” і 90 “ Даходы і расходы па бягучай дзейнасці ”;

4г) адхіленняў фактычнага сабекошту ад нарматыўнага (планавага) сабекошту вырабленай прадукцыі па рахунках 43-1 “Выпуск прадукцыі (работ, паслуг)” і 90 “ Даходы і расходы па бягучай дзейнасці ”.

Як бачна з малюнку 3, інфармацыйная сістэма ўліку асноўнай вытворчасці з’яўляецца трохступеньчатай, якая гарызантальна звязана з двухступеньчатай інфармацыйнай сістэмай уліку выпуску прадукцыі. Інфармацыйная сістэма ўліку гатовай прадукцыі з'яўляецца трохступеньчатай, якая пабудавана аналагічна іерархічнай структуры рахунку 10 “Матэрыялы”, што дазваляе атрымаць інфармацыю ў разрэзе матэрыяльна-адказных асоб і найменняў гатовай прадукцыі.

Апошнім элементам інфармацыйнай сістэмы для ўліку гатовай прадукцыі з'яўляецца двухступеньчатая структура рахунку 90 “Даходы і расходы па бягучай дзейнасці”. Акрамя гарызантальнай узаемасувязі з дапамогай двайнога запісу на сінтэтычных рахунках, усе гэтыя элементы ўзаемазвязаныя паралельнымі сістэмамі аналітычнага ўліку відаў прадукцыі. Кожная з гэтых сістэм аналітычнага ўліку выконвае ўласцівыя ёй функцыі. Напрыклад, сістэма аналітычнага ўліку выдаткаў на выпуск прадукцыі дазваляе скалькуляваць фактычны сабекошт кожнага віду як гатовай прадукцыі, так і астаткаў незавершанай вытворчасці. У выніку перадачы сегмента крэдытавых абаротаў гэтых аналітычных рахункаў у сістэму аналітычнага ўліку выпуску прадукцыі ствараецца інфармацыйная аснова для параўнання фактычнага і планавага сабекошту вырабленай прадукцыі.

Такая працэдура абмену інфармацыяй паміж паралельнымі сістэмамі аналітычнага ўліку працягваецца да завяршэння адпаведнага гаспадарчага або ўліковага працэсу. У інфармацыйнай сістэме ўліку прадукцыі гэта працэдура завяршаецца перадачай інфармацыі аб нарматыўным (планавым) сабекошце відаў рэалізаванай прадукцыі і адхіленняў іх фактычнага сабекошту ад нарматыўнага або планавага. Можа выкарыстоўвацца і больш складаная мадэль вертыкальна-гарызантальных сувязей уліковай сістэмы выпуску прадукцыі з выкарыстаннем асобных сінтэтычных рахункаў і субрахункаў для ўліку нарматыўных або планавых паказчыкаў.