Хто бы под шляхтичомъ або подъ шляхътянкою грабежъ учынилъ.
Тежъ уставуемъ: хто бы под шляхтичомъ або под шляхтянкою грабежъ учынилъ, кони побралъ при костеле, на торгу або на поли, на дорозе и где колвекъ або под слугою, который бы при пану або пане своей в дорозе ехалъ або где на местцЪ приехалъ, коня взял албо з воза выпрогъ, бы тежъ и бою жадного не въчынилъ, а на остатокъ хотя бы оная персона при томъ грабежу сама не была, а было ли бы то переведено слушнымъ доводомъ, тогды оный, который грабилъ, маеть такового самого шляхтича або шляхтянку водлугъ стану навезати, яко бы збилъ. А будеть ли хто з слугъ при грабежу такомъ раненъ або битъ, то такежъ и слугъ навезати водлугъ их стану, а коня также конем навезати и шкоду, естли будеть при томъ грабежу вчынено, за доводомъ оправити. А естли ж бы слузе чыему, едучы где за посланьемъ пана своего одному без пана на дорозе и где колвекъ, а коня пана его под нимъ пограблено, хотя бы бой былъ албо и не былъ, предъся тотъ, хто такий грабежъ шляхтичу учынить, повиненъ будеть за доводом правнымъ, яко коня конемъ, такъ и слугу оного, под кимъ пограбит водлугъ стану слуги того навезати, а иншые шкоды, если бы ся при томъ грабежы стали, оправити и заплатити. Пакли жъ бы хто такъ на поли ходячого коня шляхетского своволне пограбилъ, таковый за доводомъ толко коня конем навезати мает.
Артыкулъ 4. О грабежъ чоловека князского, паньского и земяньского.
Тежъ уставуемъ: естли бы ш[л]яхтичъ чыих людей пограбилъ на торгу, при церкви и на доброволной дорозе, таковый маеть стороне ображоной вины заплатити шесть рублей грошей, а грабеж з навезкою отдати, то естъ коня конемъ, вола воломъ навезати. А пакли бы шляхтич пограбил у чыих людей на поли албо где индей, а бою не вчинил, тогды мает заплатити три рубли грошей, а гребежъ также навезати. А мужыкъ мужыка естли при костеле або на торъгу и на дорозе пограбит, маеть заплатити два рубли грошей, а на поли естли пограбить — рубль грошей. А где бы мужыкъ шляхтича або шляхтянку пограбилъ, о томъ маеть быти сужоно водлугъ арътыкулу третего сего жъ розделу, а грабежъ всякий такежъ з навезкою платити: коня конемъ, вола воломъ, корову коровою. И кождое быдло, якое пограбилъ, таковымъ навезавши, маеть отдати або ценою заплатити, яко нижей описано естъ.
Артыкулъ 5. Цена конемъ робочымъ доморослымъ.
За коня або за сверепу две копы грошей. За третяка жеребца от робочыхъ сверепъ две копе грошей. За третячку сверепку две копе грошей. За лоньское жеребя копа грошей. За сеголетнее жеребя сорокъ грошей.
Вед же где бы который чоловекъ менилъ такие кони робочые быть купленые, тогды якъ дорого купилъ, на чомъ доводъ слушный учынить, плачоно быти маеть.
Артыкулъ 6. Цена быдлу великому и малому доморослому.
За вола две копе грошей. За быка стадника полторы копы грошей. За корову сто грошей. За яловицу семъдесять гроше[й]. За быка неука копа грошей. За телицу третячку сорокъ грошей. За теля лоньское тридъцать грошей. За теля сеголетънее двадцать грошей. За вепря коръмного копу грошей. За некормного полъкопы грошей. За кнороза сорокъ грошей. За свин[ь]ю двадцать грошей. За подъсвинъка дванадцать грошей. За порося сеголетънее пять грошей. За овцу петънадцать грошей. За барана дванадцать грошей. За скопца барана лонщака петнадцать грошей. За ягне шесть грошей. За козла четвертака або петака сорокъ грошей. За третяка полкопы грошей. За лонщака двадцать грошей. За козу двадцать грошей. За козеня сеголетнее шесть грошей.
Артыкулъ 7. Цена птахомъ домовымъ.
Гусь три грошы. Каплунъ шесть грошей. Курица три грошы. Петухъ два грошы. Утка два грошы. Селезень два грошы. Голубъ грошъ. Утка круговая три рубли грошей. За пава албо павицу тры копы грошей. За лебедя домового тры копы грошей. За кура албо за курыцу калакуцкую двадъцать грошей.
Артыкулъ 8.
Цена птахомъ, хованымъ на мысливство. Кречокъ красъный шесть рублей грошей. За белого кречета пять рублей грошей. Серый кречотъ тры рубъли грошей. Соколъ тры рубли грошей. Ястребъ великий две копе грошей. За рарога две копе грошей. За рабца або крокгулца пятьдесять грошей. За дремълюга тридцать грошей.
|
