Цена речамъ домовымъ стравънымъ.
За полоть мяса двадцать грошей. За сало петнадцать грошей. За кумпь два грошы. За медницу масла копу грошей. За сыръ великий углясты[й] два грошы. За малый округлый сыръ албо за малдрикъ осмъ пенезий [так!]. За кгомолку чотыри пенези. За медницу меду копу грошей.
Артыкулъ 11. Цена речамъ, дома робленымъ, одежы належачим и иншим.
За кожухъ бараний музский одевалный копу грошей. За кожухъ бараний жоноцкий торлопъ семъдесятъ грошей. За китликъ полъкопы гроше[й]. За сермягу двадцать грошей. За простицу синюю або черленую дванадцать грошей. За простицу чорную осмъ грошей. За локоть сукна простого сермяжного три грошы. За локоть полотна тонкого ткацъкого кужелного шесть грошей. За локоть серпанъковъ шесть грошей. За локоть наметокъ два грошы. За локоть полотна кужельного простого тканья два грошы. За локоть пачесного полотна грошъ. За локоть згребници полъгроша. За локоть скатертей водлугъ важности пряжы и ткан[ь]я такъ же, яко и за полотно. За локоть ручниковъ по половици цены скатертное. За коверцы домовое роботы, за опоны, также за постелю и иные потребы и спряты домовые за доводом водлугъ уваженья урядового. За топоръ шесть грошей. За серпъ два грошы. За косу шесть грошей. За хомутъ мужыцкий ременный шестьгрошей. Запростый два грошы. За дугу два пенези. За вожы лычаные полъгроша. За конопные грошъ. За сани мужыцкие дровни простые два грошы. За колеса мужыцкие простые шестъ грошей. За седла, узды, шлеи, лейца, узденицы, возы и иншые рыштунки водлугъ доводу и уваженья врядового. За топоръ великий, скглютъ и иншый топор дойлидъский, беднарский, сталмаский, также запилы, свердла, долота, гебли, спусты и иншые начынья, дойлидскому, столяръскому и сталмаскому, млынаръскому, по тому жъ ковалскому, слесарскому и инъшыхъ всихъ ремесниковъ [ в оригинале: «ремесникокъ» ] розныхъ ремеслу начынья належачие, мають быти сужоны и плачоны водлугъ доводу и уваженья слушного врядового.
Артыкулъ 12.
Цена собакамъ.
За пса домового брехуна три копы грошей, за наследника и за набрешника зверинного три рубли грошей, за бобрового пса три рубли грошей, за курча и за хорта три копы грошей, за выжла две копе грошей, за узлайника звериного три копы грошей, за щаю полторы копы грошей, за подстрелчого пса три копы грошей, за пса обсочного три рубли грошей, за меделянъского пса три рубли грошей, за хорта подсоколего три рубли грошей.
Артыкулъ 13.
Естли бы песъ непривязаный укусилъ або образил, и тежъ хто бы пса забилъ.
Тежъ уставуемъ: кгды бы кого песъ уелъ с чиего присчванья, а онъ бы, ставши за позваньемъ перед судомъ, к тому посчванью ся не зналъ, таковому судъ маеть въсказати отприсегнутися, ижъ того не вчинилъ. А кгды бы присегнути не хотелъ, тогды жалобная сторона, кгды его в том поприсягнеть, повиненъ его будет навезати, яко бы его самъ своею рукою ранилъ. Пакли бы хто кому пса умысльне, а не от руки забилъ або застрелилъ, таковый будет повиненъ оного пса платити водле цены, вышей описаное. Нижли, естли бы его забилъ от руки киемъ або якою бронею, себе боронечи, не пометом, ани стрелбою, таковый за оного пса ничого платити не будеть повиненъ.
Артыкулъ 14.
Хто бы в дому своемъ мелъ пса або быдля, которое бы в суседъстве шкодило.
Уставуем: естли бы в кого песъ домовый албо быдля якую шкоду у околицы чинило, а тотъ домовый г[о]с[по]д[а]рь, о томъ ведаючи, оного быдляти стеречи, а пса на привези держати и мети не хотелъ, тогды таковый будеть повиненъ всю шкоду, в суседъстве черезъ такое быдля або пса вчиненую, платити и оправовати, на што слушный доводъ будеть вделанъ. Если ж бы быдля такое человека образило, тогды тое быдля тому, кого образилъ, выдано быти маеть. А также тежъ, хто бы мелъ коня васнивого, который бы билъ, тогды повиненъ звонокъ на немъ на похвахъ албо на нозе мети для того, абы, то видячи, на него не наездъжали. А хто бы без звонка на такомъ кони ездилъ, а онъ бы кого образилъ, тогды тотъ конь за то ображоному выданъ быти маеть.
РОЗДЕЛЪ ТРЕТИЙНАДЦАТЬ: О ГРАБЕЖОХЪ И О НАВЕЗЪКАХЪ. Артыкулъ 1.
|