АлёнаБеланожка

 

Алёна Міхайлаўна Беланожка — рэжысёр, паэтка, пісьменніца, драматург. Нарадзілася 17 студзеня 1985 года ў Магілёве. Скончыла Магілёўскае Дзяржаўнае вучылішча культуры імя Н. Крупскай, Беларускі Дзяржаўны ўніверсітэт культуры і мастацтваў.

Працавала рэжысёрам, рэдактарам і метадыстам культурных устаноў Магілёва і Мінска. Аўтар кінасцэнарыяў і тэкстаў песень беларускіх зорак эстрады.

Друкавалася ў часопісах «Маладосць» і «Верасень» (Беларусь), «Лауреат» (Расія), газетах «Веснік Магілёва», «Магілёўскія Ведамасці», «Советская Белоруссия», «Літаратура і Мастацтва».

Аўтар паэтычнага зборніка «В шаге от неба» (2007), кнігі «Чамадан з кракадзілавай скуры».

Аб сабе маладая аўтарка кажа: «Літаратура сама мяне знайшла. Я з дзяцінства пішу. Думала, такі лад жыцця ва ўсіх. А потым зразумела — не... Але было позна — літаратарства злавіла мяне на жыўца. Вершы, апавяданні…»

 

Беланожка, Алёна. Чамадан з кракадзілавай скуры: аповесць / А. Беланожка. — Мінск: Звязда, 2014. — 176 с. — (Бібліятэка часопіса «Маладосць» ).

Аповесць Алёны Беланожкі «Чамадан з кракадзілавай скуры» можна аднесці да жанру іранічнага дэтэктыва. Сама пісьменніца характарызуе ўласны твор як «вясёлую аповесць, адрасаваную моладзевай аўдыторыі». Дастаткова толькі адной цытаты з аповесці — «Добрай фiрменнай адвёрткай можна адрамантаваць усё, што заўгодна, акрамя здароўя i бiяграфii», — каб чытач сам вырашыў, ці варта яму чытаць гэты твор.

Аліна, галоўная гераіня аповесці, — кіраўнік прадзюсарскага цэнтра, актыўная дзяўчына з дзелавой хваткай. Стаўшая ахвярай гвалтоўнага выкрадання, яна здолела збегчы і самастойна раскруціць увесь клубок незразумелых здарэнняў.

Наконт галоўнай гераіні аўтарка кажа так: «З сябе пісала, а як іначай? Характар — мой… А галоўная гераіня мне блізкая тым, што яна не баіцца людзей. Яна іх любіць. Розных, усякіх. Іначай яна б ніколі не выбрала сабе такі занятак — клапаціцца пра тое, каб іх настрой заўсёды быў добрым».

Прачытайце аповесць — і добры настрой вам забяспечаны!

 

Артыкулы пра аўтара і яе творчасць:

 

1) Весялуха, М. Гісторыя з выкраданнем / М. Весялуха // Звязда. — 2015. — 5 лютага. — С. 8

2) Грышчук, А. Горкі смех рэжысёра / А. Грышчук // Літаратура і мастацтва. — 2014. — № 12. — С. 6-7

3) Грышчук, А. Жыццё не цукар / А. Грышчук // Літаратура і мастацтва. — 2014. — № 42. — С. 6

4) Новік, Ю. Дасягаць усё новых і новых вяршыняў / Юлія Новік, Алёна Беланожка // Маладосць. — 2011. — № 3. — С. 120-122

5) Шчарбачэвіч, Н. «Скрозь «Маладосць» — у літаратуру / Н. Шчарбачэвіч // Звязда. — 2014. — 23 снежня. — С.8