Юлдар сатында тыуған уйҙар...

Тәүәккәллек һәм рух менән һуғарылған сәйәхәт

Салауат Юлаев эҙҙәре буйлап Журналистар экспедицияһы үткәрелеүгә быйыл 14 июлдә 10 йыл тула. Ошо арауыҡта Крәҫтиәндәр һуғышына бәйле бөтөн урындарға тиерлек сәфәрҙәр ҡылынды, меңдәрсә саҡырымдар һаналды, өс китап донъя күрҙе (2003 йылда – беренсеһе, 2005 йылда – икенсеһе). Һәм Салауат Юлаевтың тыуыуына 260 йыл тулыу алдынан, экспедиция ойошторолоуҙың 10 йыллығына ҡарата 2005 – 2008 йылдарҙағы сәфәрҙәр материалдары ингән “Сал Уралдан – алыҫ Балтиккаса” тип аталған өсөнсө китап сыҡты. Финанс ҡатмарлыҡтары арҡаһында ул әлегә электрон вариантта ғына, ләкин ваҡыт үтеү менән уның баҫма варианты ла нәшер ителеренә өмөт бар.

Ошо китап сығыуҙы сәбәп итеп, бер мәл бөтөн республика халҡын туплаусы сараға әүерелеп, бөгөн район кимәлендәге байрам итеп кенә ҡалдырылһа ла үҙенең яңғырауыҡлы Салауат көндәре тигән исемен юғалтмаған байрам уңайынан тарих биттәрен ҡабат аҡтарып, Башҡортостан журналистары акцияһының нисек барлыҡҡа килеүенә күҙ һалайыҡ, булмаһа...

Юлдар сатында тыуған уйҙар...

2003 йыл. Башҡорт халҡының милли геройы Салауат Юлаевтың тыуыуына 250 йыл тула. Уны уҙғарыу тураһында республика Президентының Указы бар. Төрлө министрлыҡтар, ведомстволар үҙҙәренең саралар планын әҙерләй. Ул ваҡыттағы Матбуғат һәм киң мәғлүмәт министрлығы ла план төҙөй, әммә министр Зөфәр Тимербулатовты ғәҙәти саралар: мәҡәләләр, интервьюлар, тарихи материалдар, бәлки, китап сығарыу, ҡәнәғәтләндермәй. Уның күңелен тынғы бирмәй: “Ә үҙенсәлеге ҡайҙа?” – тигән һорау ҡорт кеүек кимереп тик тора. Шундай ғәҙәти яҙғы көндәрҙең береһендә уға Башҡортостан Журналистар союзы рәйесе Марсель Сәлимов шылтыратып, Ҡурған өлкәһенән колегаларыбыҙ килеүе, осрашырға теләүҙәрен белдерә. Ике етәксе ҡурғандарҙы юл сатында көтөп тора. Һүҙ артынан һүҙ сыға, Зөфәр Мөхтәр улы Марсель Шәйнур улынан яйлап ҡына төпсөнә башлай: Ҡурған журналистары ниндәй маҡсат менән йөрөй, ҡайҙан ҡайтып киләләр һ.б. Баҡтиһәң, улар Ҡурған автомобиль заводының автобустарын рекламалауҙың шундай үҙенсәлекле ысулын уйлап тапҡан икән – үҙҙәренсә маркетинг аҙымы. Автобуста тирә-яҡ өлкәләр, республикалар, губерналар буйлап сәфәр ҡылалар, туҡтаған ерҙәрендә автобустарҙы пропагандалайҙар. Шул саҡ шәп фекер ярала: әгәр беҙ Салауат Юлаевты этап менән алып киткән маршрут буйынса журналистарҙың акция-экспедицияһын ойошторһаҡ? Тиҙҙән юлдар сатында тыуған фекер амбициоз планға әүерелә.