Тарих ҡабатлана, тиҙәр...

“2003 йылда мин Зөфәр Мөхтәр улынанмы, Фәнил Шәмсетдин улынанмы акция тигән һүҙ ишеттем. Мәҙәниәт кешеләре проект, ти. Айырма нимәлә: проект – бер тапҡыр ғына була, ә акцияны дауам итергә мөмкин. Акция тигәс, уны мотлаҡ дауам итергә кәрәк һәм был хаҡта һорауҙың булыуы ла мөмкин түгел. Салауат тураһында күпме генә өйрәнһәң дә, күпме генә материал туплап йөрөһәң дә, күпме генә тапһаң да бер ваҡытта ла табып бөтөрлөк түгел. Ул сикһеҙ, тип әйтергә кәрәк. Шуға күрә, әгәр ҙә мөмкинлек була икән, рәхәтләнеп ултырып пландар төҙөп, Президентҡа мөрәжәғәткә уларҙы индерергә кәрәк. Сөнки Салауат Юлаевтың 2014 йылда үтәсәк юбилейына аҡса бүленәсәк, шунда эләгеп ҡалыу мөһим”, - тине Мирас Иҙелбаев. Ғөмүмән, экспедициянан ҡайыу менән төркөм ағзаларынан бер нисә кеше ул ваҡыттағы Хөкүмәт Премьер-министры урынбаҫарына ингәйнек. Экспедиция йомғаҡтары менән таныштырҙыҡ, тәҡдимдәр исемлеген ҡалдырҙыҡ. Үкенескә күрә, уның буйынса бер нәмә лә тигәндәй эшләнмәне. Осрашыу барышында ла был хаҡта Фәнил Ҡоҙаҡаев әсенеп билдәләне. Бер генә миҫал: Өфө-Палдиски маршруты буйынса туристик маршрут асырға тәҡдим ителгәйне. Бөгөн республика туризмды үҫтереүгә ҙур иғтибар бүлгәндә, был тәҡдимде ҡабат күтәреп сығып, шулай уҡ башҡа тәҡдим-теләктәрҙе лә индереп, республика Президентына мөрәжәғәт итеү идеяһы берҙәм хупланды.

Юҡҡа ғына, тарих ҡабатлана, тимәйҙәр. Ул был юлы ла ҡабатланып, журналистар акцияһы дауам итһен ине...

Шулай ҙа...

Бынан 10 йыл элек ойошторолған экспедиция тәүге мөхәббәт кеүек, унда ҡатнашыусыларҙың һәр береһенең күңелендә яҡты хистәр генә ҡалдырып йәшәйҙер. Тәүге мөхәббәт шуныһы менән ҡәҙерле, унда тойғолар саф, таҙа, ихлас була. Йылдар үтһә лә ул йөрәк түрендә ғүмерҙең иң матур мәле булып һаҡлана. Ваҡытында унда күҙ йәштәре лә, һағыш та, күңел ҡайтыуҙар ҙа булалыр, бәлки, әммә улар онотола, бары тик яҡты, матур тойғолар ғына ҡала. Башҡортостан Журналистарының тәүге экспедицияһы ла тәүге мөхәббәт кеүек ҡәҙерле. Хәҙер иҫләһәң, унда ла төрлө ҡытыршылыҡтар, аңлашмаусылыҡтар килеп тыуғандыр. Ләкин улар хәтерҙә юҡ. Бары тик бер командаға әүерелгән коллектив, Салауат рухы, һаманғаса күңелдәрҙе йылытып торған дуҫлыҡ тойғоһо ғына ҡалған. Бәлки, ысынлап та, милли геройыбыҙҙың тыуыуына 260 йыл тулғанда Палдискиға тағы ла журналистар экспедицияһы ойошторолор. Бәлки, унда бөтөнләй башҡалар, йәш коллегаларыбыҙ барыр. Әммә беҙ ҡатнашҡан экспедиция – ул тәүгеһе, ул дәүләт етәкселегенең ҡатнашлығынан һәм ярҙамынан тыш ойошторолдо, бәлки, шуның өсөн дә ул рәсмилектән азат булып, ябайлығы менән айырылып та торғандыр; бәлки, шуның өсөн дә унда саҡ ҡына башбаштаҡлыҡ та, тәүәккәллек тә, рух күтәренкелеге лә сағылыш тапҡандыр һәм тарихта шулай булып ҡаласаҡ та.

Йыл.