Шағын мектептегі оқушыға тәрбие үш бағыттан әсер етеді.

Сабақтағы тәрбие жұмысы;

Сабақтан және сыныптан тыс тәрбие жұмыстары;

Елді мекеннің қоғамдық ортасының тәрбиесі;

Тәрбиелік іс-шаралар мектеп көлемінде жылына 3-4 рет өтеді. Оларды ұжым бірігіп әзірлейді. Мұғалім баллармен бірге жоспар жасап, міндеттерді бөледі.

Мереке кезінде оның символы мен ұранына конкурс ұйымдастырылады, сыйлықтар әзірленеді. Мұғалім тек көмектеседі, барлығын балалар өздері жасайды.

Тәрбие жұмысының жоспарын ұжымның өзі, немесе аймақтың тәрбие орталықтары ұсынған бағдарлама бойынша жасайды. Жоспар бір аптаға, айға, жарты жылға жасалады. Ең бастысы әдемі жасалған жоспар емес, нақты істер, атқарылған іс-шаралардың маңыздылығы.

Бірінші сыныптағы ақыл-ой тәрбиесінің; маңызды бағыты жүйелі оқуға әзірлеу. Маңызды жағдай балаға сенім арту, оны дамытатын орта жасау. Бірыңғай педагогикалық талап жақсы мінез-құлықты қалыптастырады.

Адамгершілік тәрбиесін беру үшін бала өзінің адалдығын, қайырымдылығын, зейінділігін көрсететін жағдайлар жасалады.

Еңбек тәрбиесінің; басты мақсаты еңбек сүйгіштікті, еңбекті, еңбек адамдарын құрметтей білуге тәрбиелеу, мамандық туралы түсінікті қалыптастыру. Ол үшін түрлі әңгімелер өткізіледі. Балалар өздерінің әлі келетін жұмыстарды территорияны, сынып бөлмесін тазалап, ауылды, учаскені көгалдандыруға қатысады, гүлдерді қарайды т.б. Жеміс, жидек және көкөніс өсіруге болады, үйірмеде оқушылар халқымыздың ұлттық өнерін де үйренеді.

Экологиялық тәрбие беру үшін алдымен балаларды экскурсияға апарып, қорғау керек объектілерді көрсетіп түсіндіру. Оқушылар оларды қорғауға атсалысады.

Эстетикалық тәрбиемен де оқушыларды таныстыру керек, ол өнермен тығыз байланысты.

Сонымен, шағын комплектілі мектептегі тәрбие жұмысының өзіндік ерекшеліктері бар. Атап айтсақ, ата-аналармен тығыз байланыс орнату, әр оқушының тәрбиесіне ықпал ету, халықтық дәстүрлерге сүйену, табиғатқа жақындық. Ақыл-ой, дене, еңбек, моральдық, сезімдік тәрбие жүзеге асырылады. Жоспарда мұғалім т.б. тәрбиешілердің оқушылармен бірлесіп істейтін жұмыстары әр жас кезеңдеріне сай көрсетіледі. Тәрбие жұмысы ізгілік принципіне негізделген және баланың жеке тұлғалық сапаларын қалыптастыруға бағытталған болады.